კომუნიკაციების კომისიამ ტელეკომპანია ფორმულას წინააღმდეგ საზოგადოებრივი მაუწყებლის საჩივარის საავტორო უფლებების ნაწილი წარმოებაში მიიღო.

კომისიამ მოსამზადებელ სხდომაზე იმსჯელა და გადაწყვიტა, რომ ფეისბუქზე გავრცელებულ ვიდეოსთან დაკავშირებით სარჩელს წარმოებაში ვერ მიიღებს, რადგან აქ მისი კომპეტენცია არ ვრცელდება. იგივე ეხება ქცევის კოდექსს, რადგან კომისია ამბობს, რომ ამ მიმართულებით არხის თვითრეგულირების ორგანომ უნდა იმსჯელოს.

კომისიის წარმომადგენელმა მოსამზადებელ სხდომაზე განმარტა, რომ საზოგადოებრივი მაუწყებლის სარჩელი ეხებოდა როგორც საავტორო უფლებებს, რაც ლოგოს გამოყენებას გულისხმობს, ასევე, მაუწყებელთა ქცევის კოდექსს, რადგან, საზმაუს მტკიცებით, გადაცემა ფსკერმა მაყურებელი შეცდომაში შეიყვანა.

საპასუხოდ, ფორმულამ წარადგინა მტკიცებულებები, რომლის მიხედვით, გადაცემას სატელევიზიო ეთერში ჰქონდა როგორც საზოგადოებრივი მაუწყებლის, ასევე, ფორმულას ლოგო, შესაბამისად, ის მაყურებელს შეცდომაში ვერ შეიყვანდა. ამასთან, იგივე ვიდეო მასალა განთავსდა ტელეკომპანიის Facebook გვერდზე, სადაც ფორმულას ლოგო არ ჰქონდა, თუმცა ტელეკომპანია მიუთითებს, რომ ინტერნეტის რეგულირება კომუნიკაციების ეროვნული კომისიის უფლებამოსილება არ არის.

გარდა ამისა, ფორმულას მტკიცებულებებს შორის არის ამერიკული არხის, NBC-ის გადაცემა, რომლშიც FOX NEWS-ის პაროდია იყო და მის ლოგოს იმეორებდნენ.

ფორმულას წარმომადგენელმა სხდომაზე განაცხადა, რომ საჩივარი ორივე ნაწილში დაუშვებლად უნდა იყოს ცნობილი და არსებით განხილვაში არ მიიღონ. ეთერ ქათამაძემ მიუთითა საქართველოს კონსტიტუციით გარანტირებულ სიტყვისა და გამოხატვის თავისუფლებაზეც.

"ფსკერი არის იუმორისტული ჟანრის გადაცემა და პაროდიის განხილვა საავტორო უფლების ჭრილში არ არის მართებული. თუ საზოგადოებრივი მაუწყებელი მიიჩნევს, რომ მისი უფლებები დაირღვა, უნდა მიმართოს სასამართლოს. მარეგულირებელი კომისიის მიერ სარჩელის წარმოებაში მიღება ნიშნავს იმას, რომ მოხდება გადაცემის შინაარსში შესვლა, რაც გამოიწვევს ცენზურას და შესაძლოა, ისეთ უფლებას შეექმნას საფრთხე, როგორიცაა სიტყვისა და გამოხატვის თავისუფლება", — თქვა ქათამაძემ.

რაც შეეხება მაუწყებელთა ქცევის კოდექსის კუთხით პრეტენზიებს, ქათამაძემ მიუთითა, რომ ამას თვითრეგულირების მექანიზმი არეგულირებს და საზოგადოებრივ მაუწყებელს შეუძლია ფორმულას მიმართოს, თუ მიაჩნია, რომ მისი უფლებები დაირღვა.

ეთერ ქათამაძემ ისაუბრა მაყურებლის შეცდომაში შეყვანის შესახებ განცხადებაზეც და აღნიშნა:

"იუმორისრტული ჟანრის სკეტჩის მიერ საზოგადოების შეცდომაში შეყვანა არარეალურია და არ არსებობს ლეგიტიმური საფუძველი, რომ ვინმე შეიძლება შეცდომაში შესულიყო".

სხდომაზე ჩაერთო გადაცემა ფსკერის ავტორი და წამყვანი, ნიკა ქავთარაძეც. მისი განმარტებით, პაროდიის პრინციპი სწორედ ისაა, რომ არ იყოს წარწერა "პაროდია", ისევე, როგორც მიმდინარე სხდომას არ აწერია "სერიოზული სხდომა".

ამასთან, ქავთარაძის თქმით, გადაცემაში იყვნენ უცნობი მსახობები და მაყურებელს ისინი მრავალი მილიონით დაფინანსებული საზოგადოებრივი მაუწყებლის ჟურნალისტები ვერ ეგონებოდა და თუ ასე მოხდებოდა, ეს მაუწყებლისვე "პრობლემაა".

ნიკა ქავთარაძემ თქვა ისიც, რომ საავტორო უფლებებს რეალურად საზოგადოებრივი მაუწყებელი არღვევს, რომელმაც უცხო ქვეყნის კონტენტი თარგმანის გარეშე გამოიყენა. თუმცა სხვა დეტალებზე მას არ უსაუბრია და აღნიშნა, რომ ვიდეოს კვირას, გადაცემა ფსკერში წარმოადგენს.

სხდომაზე საზოგადოებრივ მაუწყებელს დიმიტრი ბერძენიშვილი წარმოადგენდა, რომელიც მიიჩნევს, რომ ფორმულამ დაარღვია როგორც საავტორო უფლებები, ისე მაუწყებელთა ქცევის კოდექსი. მისი თქმით, საზმაუ იუმორს და სარედაქციო პოლიტიკას პატივს სცემს და სიტყვის თავისუფლების კუთხით სტანდარტებსაც აწესებს. ბერძენიშვილის განმარტებით, საუბარია იმაზე, რომ მასალა არ უნდა გავრცელდეს საზოგადოებრივი მაუწყებლის შეფუთვით.

სხდომის ბოლოს კახა ბექაურმა აღნიშნა, რომ კომუნიკაციების კომისია თვითრეგულირების საკითხებს, ასევე, ფეისბუქს არ არეგულირებს, ხოლო საავტორო უფლებების ნაწილში განხილვის კომპეტენცია აქვს. მისივე თქმით, ეს მასალის შინაარსში შესვლა არ იქნება.

საქმეზე არსებითი განხილვა 2020 წლის 27 აგვისტოს ჩაინიშნა.