ბელარუსის პრეზიდენტმა, ალექსანდრე ლუკაშენკომ განაცხადა, რომ თუ ახალი არჩევნების ჩატარება სურს ხალხს, მაშინ ჯერ ახალი კონსტიტუცია უნდა მიიღონ.

"პრეზიდენტმა გადაწყვეტილებები ზეწოლის ქვეშ არ უნდა მიიღოს. იქნება ასე — ჩვენ უნდა მივიღოთ ახალი კონსტიტუცია, რომელიც თქვენ გინდოდათ. თქვენ უნდა მიიღოთ ის რეფერენდუმებზე, იმიტომ რომ ჩვენ წინა კონსტიტუციაც რეფერენდუმით მივიღეთ. და ახალი კონსტიტუციით ჩავატაროთ არჩევნები, თუ თქვენ გსურთ. პარლამენტისაც, პრეზიდენტისაც და ადგილობრივი ხელისუფლებისაც", — ასე მიმართა ლუკაშენკომ ერთ-ერთი ქარხნის თანამშრომლებს.

მანამდე, მინსკის ტრაქტორის ქარხნის თანამშრომლებთან შეხვედრისას ლუკაშენკომ განაცხადა, რომ ბელარუსში განმეორებით არჩევნებს არ დაუშვებს და ამის ყველანაირი შესაძლებლობა წინასწარ გამორიცხა.

"ვერ ეღირსებით, რომ ზეწოლის ქვეშ რამე გავაკეთო", — აცხადებდა მეექვსე ვადით გაპრეზიდენტებული ლუკაშენკო, რომელმაც დაამატა, რომ თუ საწარმოს თანამშრომლებს მუშაობა არ უნდოდათ და ამიტომ გამოდიოდნენ აქციაზე, მათ შეეძლოთ, სამსახურიდან წასულიყვნენ.

ლუკაშენკოს წინააღმდეგ და ხელახალი სამართლიანი არჩევნების მოთხოვნით მრავალათასიანი აქციები მინსკში დღემდე არ წყდება.

მასშტაბური საპროტესტო აქციები ქვეყნის ყველა ქალაქში მიმდინარეობს და გაფიცვებში ყველა მსხვილი საწარმოა ჩართული. პროტესტი მას შემდეგ დაიწყო, რაც საპრეზიდენტო არჩევნების დროს კვლავ ლუკაშენკოს გამარჯვების შესახებ შედეგები გამოქვეყნდა. ლუკაშენკო ქვეყანას 26 წელია მართავს.

ადგილობრივი მედიის ცნობით, აქციების მიმდინარეობისას პოლიციამ აქციის ათასობით მონაწილე დააკავა. გავრცელდა ინფორმაცია ორი დაღუპულის შესახებაც.