ცენტრალური საარჩევნო კომისიის თავმჯდომარე, თამარ ჟვანია აცხადებს, რომ მთავრობის მხრიდან პანდემიის დროს გაცემული სოციალური დახმარებები კანონმდებლობით მოსყიდვად არ ითვლება.

ჟვანიას განმარტებით, საარჩევნო კანონმდებლობის დარღვევის შეფასება შეიძლება მხოლოდ მას შემდეგ, რაც არჩევნების თარიღი გამოცხადდება.

"ყველა აკრძალვა ძალაში შედის მაშინ, რაც არჩევნები დაინიშნება. შესაბამისად, საარჩევნო კანონმდებლობის დარღვევის ფარგლებში საარჩევნო ადმინისტრაცია კონკრეტული ფაქტის შეფასებას შეძლებს მხოლოდ მას შემდეგ, რაც ეს ნორმები ამოქმედდება. შესაბამისად ის სოციალური დახმარებები, რაც პანდემიამ დამატებით გამოიწვია, ეს ადრეც ასე იყო, მანამ, სანამ საარჩევნო რეჟიმი არ იქნება ჩართული ოფიციალურად. ასეთი ტიპის დახმარებები არ ითვლება მოსყიდვად, ამიტომ ჩვენ ამ ნაწილში ვერ გავაკეთებთ რეაგირებას მანამ, სანამ საარჩევნო რეჟიმი არ იქნება ამოქმედებული", — განაცხადა ჟვანიამ.

კითხვა ეხებოდა საქართველოს პრემიერმინისტრის, გიორგი გახარიას განცხადებას, რომლის მიხედვითაც 17 წლამდე ყველა ბავშვი ერთჯერადად 200 ლარის ოდენობით დახმარებას მიიღებს.