ბელარუსის დედაქალაქში ათასობით ადამიანი ლუკაშენკოს იმ ძალადობრივი მეთოდების გასაპროტესტებლად იკრიბება, რომელსაც ის მშვიდობიანი აქციის დაშლისთვის იყენებს. აქციის მონაწილეებს ხვალიდან სახელმწიფო მედია შეუერთდება. ხალხი ყვავილებითა და ბუშტებით ქუჩაშია გამოსული, რათა აჩვენონ, რომ მათი მსვლელობა მშვიდობიანია.

ბელარუს მშვიდობიან მოქალაქეებსა და პოლიციას შორის შეტაკება სულ რამდენიმე დღის წინ მოხდა. ხალხი პროტესტს ღიად გამოთქვამს. გარეთ გამოსული ხალხი აპროტესტებს იმ ძალადობას, რასაც ხელისუფლება მათ წინააღმდეგ რეზინის ტყვიებით, ცრემლსადენი გაზით, ათასობით ადამიანის დაპატიმრებით, ცემითა და მკვლელობით ახორციელებს.

მიუხედავად ამ ყველაფრისა აქციაში მონაწილეთა რაოდენობა მზარდია და მონაწილეებს მედია, საჯარო სამსახურისა და ქარხნების თანამშრომლები შეუერთდნენ.

სამთავრობო ტელევიზიის თანამშრომლები აცხადებენ, რომ ორშაბათიდან გაფიცვას დაიწყებენ. მათი მოთხოვნა მედიაზე განხორციელებული ცენზურის შეწყვეტა და ფაქტების ობიექტურად გაშუქების შესაძლებლობის მოპოვებაა.

"პირველად ჩვენს ცხოვრებაში შეგვიძლია თავისუფლება შევიგრძნოთ! ეს შესანიშნავი გრძნობაა", — განაცხადა აქციის ერთ-ერთმა მონაწილემ.

ისინი ფიქრობენ, რომ ლუკაშენკოს 26 წლიანი მმართველობის შემდეგ ქვეყანას წინ ახალი დასაწყისი ელის.

"დარწმუნებული ვართ, რომ ყველაფერი შეიცვლება. ჩვენი გამარჯვების გვჯერა. სწორედ ამიტომ გამოვდივართ ქუჩაში ყოველდღე", — აღნიშნა აქციის მონაწილემ.

ამ მოვლენების პარალელურად ლუკაშენკო ძალაუფლების დათმობას არ აპირებს და დახმარებას პუტინს სთხოვს, რომელიც, თავის მხრივ, თავის ტრადიციულ მეთოდს იყენებს და ლუკაშენკოს დახმარებას კოლექტიური სწრაფი რეაგირების ძალებით აპირებს, რომელიც სამხედრო გაერთიანებაა და მის შემადგენლობაში 18 000 ადამიანია.

9 აგვისტოს ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა. გარდაცვლილია ორი ადამიანი.