თბილისში, რუსთაველის გამზირზე ბელარუსში მიმდინარე აქციების მხარდასაჭერი მშვიდობიანი აქცია გაიმართა.

ბელარუსი ახალგაზრდების მიერ ორგანიზებულ აქციას მოძრაობა სირცხვილია ეხმარება. მონაწილეები თავისუფლებასა და პოლიტპატიმრების გათავისუფლებას მოითხოვენ.

როგორც აქციის ორგანიზატორი, ირა მასალსკაია ამბობს, მინსკში მსგავსი პროტესტის საშუალება არ აქვთ:

"მინსკში, თუნდაც მშვიდობიანი პროტესტით რომ გამოვსულიყავი, მეორე დღეს კაკუნს გავიგებდი კარზე და ციხეში წამიყვანდნენ. გვინდა, სოლიდარობა გამოვუცხადოთ იმ ხალხს, ვინც ახლა ბელარუსში საკუთარი უფლებებისთვის იბრძვის", ― განაცხადა მასალსკაიამ.

აქციის მონაწილეებს მშვიდობისა და სოლიდარობის ნიშნად თეთრი გლადიოლუსები უჭირავთ და მხარდამჭერებს თეთრ სამაჯურებს ურიგებენ.

პროტესტის მონაწილეები საპროტესტო აქციებს 9 აგვისტოდან მართავენ. მათ ბელარუსში მიმდინარე აქციების დროს დაღვრილი სისხლის სიმბოლოდ წითელი ვარდის ფურცლები დაყარეს.

მინსკში მასობრივი საპროტესტო გამოსვლები მას შემდეგ დაიწყო, რაც ეგზიტპოლის შედეგების მიხედვით, ქვეყნის მოქმედი პრეზიდენტი, ალექსანდრ ლუკაშენკოს ამომრჩეველთა 79.7 პროცენტი უჭერს მხარს. მის მთავარ მოწინააღმდეგეს, სვეტლანა ტიხანოვსკაიას კი 6.8 პროცენტიანი მხარდაჭერა ჰქონდა. ქვეყანაში ალექსანდრე ლუკაშენკოს 26 წლიან მმართველობას აპროტესტებენ და არჩევნების შედეგების ბათილად ცნობას ითხოვენ. უკვე მეხუთე დღეა ხელისუფლება საპროტესტო სულისკვეთებას სასტიკი ქმედებებით ახშობს.