12 დეკემბრისთვის, ერთ ღამეში, ბრენტის მარკის ნავთობის ფასმა ბარელზე $57,89 შეადგინა. თუმცა, BBC-ის ცნობით, ფასმა მოგვიანებით ოდნავ დაიწია და ბარელზე $56,64-ზე გაჩერდა.

ნავთობის ფასმა მინიმუმ 6 პროცენტით მოიმატა მას შემდეგ, რაც ნავთობის ექსპორტიორ ქვეყანათა გაერთიანებამ (OPEC) 2001 წლის შემდეგ, პირველ შეთანხმებას მიაღწია, წარმოების შემცირების შესახებ. ოპეკის წევრებმა ერთი თვის წინ განაცხადეს, რომ 2017 წლის იანვრიდან, ნავთობის მოპოვება ყოველდღიურად 1,2 მილიონი ბარელით შემცირდებოდა. გარდა ამისა, ოპეკის არაწევრი ქვეყნებიც, მათ შორის რუსეთიც, შეთანხმდნენ, რომ წარმოებას დღეში 558,000 ბარელით შეამცირებენ, რაც ასევე მის ფასს გაზრდის.

აღნიშნული შეთანხმება წარმოადგენს პირველ გლობალურ პაქტს, ბოლო 15 წლის განმავლობაში.

მიუხედავად გაძვირებისა, ბრენტის ბარელის ფასი მაინც 50 პროცენტით დაბალი რჩება, ვიდრე 2014 წელს იყო.

ფოტო: BBC/ Bloomberg

ზოგიერთი ექსპერტი ეჭვობს რომ ამ შეთანხმებას, გრძელვადიანი ეფექტი ექნება.

ვინ შედის ოპეკის გაერთიანებაში?

ნავთობის ექსპორტიორ ქვეყანათა ორგანიზაციაში (ოპეკი) შედიან ნავთობმწარმოებელი ქვეყნები: ალჟირი, ანგოლა, ინდონეზია, ირანი, ერაყი, ქუვეითი, ლიბია, ნიგერია, კატარი, საუდის არაბეთი, არაბთა გაერთიანებული საამიროები, ეკვადორი და ვენესუელა.

ორგანიზაციის მთავარი მიზანი, წესდების მიხედვით, მის წევრების ინტერესების ოპტიმალურად დაცვის საშუალებების გასაზღვრაა, რაც ითვალისწინებს გზებისა და საშუალებების გამონახვას საერთაშორისო ნავთობის ბაზრებზე ფასების სტაბილიზაციის უზრუნველსაყოფად, ზიანის მომტანი ცვალებადობის თავიდან ასაცილებლად.