იუსტიციის საბჭოს ყოფილი არამოსამართლე წევრი ანა დოლიძე ამბობს, რომ დიდუბე-ჩუღურეთში მაჟორიტარად კენჭს იყრის. ამის შესახებ მან ფეისბუქზე დაწერა. აღნიშნულ ოლქში ქართულმა ოცნებამ კანდიდატად გია ვოლსკი წარადგინა.

"ვერ დავუტოვებ საქართველოს გია ვოლსკის და მის ამფსონებს; ადამიანს, რომელსაც არავითარი შესაძლებლობა არ აქვს აქციოს ეს რაიონი ქალაქის ეკონომიკურ-კულტურულ ეპიცენტრად, უპასუხოს 21-ე საუკუნის გამოწვევებს და საჭირო ახალი მუხტი მისცეს ჩვენ ქვეყანას. ან დავრჩებით ვოლსკისთან ერთად ფანრიანი ტელეფონის ეპოქაში ან შევალთ 21-ე საუკუნეში. ეს იქნება დავითისა და გოლიათის ბრძოლა, თუმცა დარწმუნებული ვარ, რომ გამარჯვება საქართველოს უკეთესი მომავლის მხარეზეა", — წერს დოლიძე.

ჯერ კიდევ საბჭოს წევრობის დროს ანა დოლიძემ მოძრაობა ხალხისთვის შექმნა. ივნისში კი მან, ალეკო ელისაშვილმა, ლევან იოსელიანმა და დეპუტატმა ლევან კობერიძემ ახალი პოლიტიკური პლატფორმა ჩამოაყალიბეს.