86 წლის შემდეგ პირველად, აია სოფიას ტაძარი მეჩეთია და დღეს პარასკევის ლოცვები აღევლინება. ლოცვას თურქეთის პრეზიდენტი რეჯეფ თაიფ ერდოღანიც დაესწრება.

თურქეთში ისლამისტები დიდი ხანი ითხოვდნენ, რომ აია-სოფია ისევ მეჩეთად გადაკეთებულიყო, თუმცა ოპოზიცია მუდამ ამის წინააღმდეგ გამოდიოდა. აია-სოფია Unesco-ს მსოფლიო მემკვიდრეობის სიაშია და ორგანიზაცია თურქეთის ხელისუფლებას მოუწოდებდა, რომ ძეგლისთვის სტატუსი არ შეეცვალათ.

მეჩეთად გადაკეთებას ხელი ერდოღანმა მოაწერა. ამ გადაწყვეტილებამ დიდი კრიტიკა გამოიწვია როგორც რელიგიურ, ისე პოლიტიკურ ლიდერებს შორის. საქართველოს მართლმადიდებელი ეკლესიის საპატრიარქოც თურქეთს მოუწოდებდა, რომ აია-სოფია კვლავ მუზეუმად დარჩენილიყო.

თურქეთის სასამართლომ 10 ივლისს მუზეუმის სტატუსის გაუქმებისა და მეჩეთის აღდგენის გადაწყვეტილება მიიღო. აღნიშნული გადაწყვეტილება ბევრისთვის სადაოა. აია-სოფია 1 500 წლის წინ,ბიზანტიის იმპერიის დროს, მართლმადიდებლურ ტაძრად აშენდა, კონსტანტინოპოლის დაცემის შემდეგ კი, ოსმანთა იმპერიაში მეჩეთად გადაკეთდა. თანამედროვე თურქეთის დამფუძნებელმა, ქემალ ათათურქმა 1934 წელს აია-სოფიას მუზეუმის სტატუსი მიანიჭა.