პოპულარული აპლიკაცია Maps.me, რომელიც ნავიგაციისთვის გამოიყენება, საქართველოს ოკუპირებულ ტერიტორიებს, აფხაზეთსა და ე.წ. "სამხრეთ ოსეთს" დამოუკიდებელ სახელმწიფოებად აჩვენებს.

ეს აპლიკაცია საკმაოდ პოპულარულია, რადგან Offline რეჟიმში გამოყენების შესაძლებლობას იძლევა. ამ მომენტში, გუგლის მონაცემებით, აპით 50 მილიონზე მეტი მომხმარებელი სარგებლობს.

ფოტო: Maps.me / On.ge

აღსანიშნავია ისიც, რომ ამ აპლიკაციის რუკაზე ოკუპირებული ყირიმი მონიშნულია როგორც რუსეთის ნაწილი. ასევე, მიუხედავად იმისა, რომ ცალკე საზღვრით არაა გამოყოფილი, თვითგამოცხადებული მთიანი ყარაბაღის რესპუბლიკა ცალკე სახელმწიფოდ იძებნება.

აპლიკაცია Maps.me 2011 წელს მინსკში დაფუძნდა. 2014 წელს აპლიკაცია რუსულმა ონლაინ მაგნატმა Mail.ru ჯგუფმა შეისყიდა. აპლიკაცია განკუთვნილია iOS, Android და Blackberry სისტემებისთვის და მას რამდენიმე ათეული მილიონი მომხმარებელი ჰყავს.

On.ge ამ საკითხზე საგარეო საქმეთა სამინისტროს დაუკავშირდა. ჩვენ დავინტერესდით, იციან თუ არა უწყებაში ამ ფაქტის შესახებ. მათ პასუხს მიღებისთანავე შემოგთავაზებთ.

Maps.me-ზე ოკუპირებული აფხაზეთისა და ე.წ. სამხრეთ ოსეთის დამოუკიდებელ ქვეყნებად დაფიქსირების შესახებ ინფორმაცია თავდაპირველად მითების დეტექტორმა გაავრცელა.