ამ სიტუაციაში ყველანი ვყოფილვართ: ხანგრძლივი სამუშაო დღის შემდეგ სახლში ბრუნდები, დაღლილი და მშიერი ხარ, ამიტომ ჩიფსების ხრამუნს იწყებ და თან დაგვიანებულ სადილს გეგმავ.

ეს წახემსება მალევე განაყრებს. საბედნიეროდ, დიეტოლოგთა ქვემოთ მოცემული რჩევების ყოველდღიურობაში დანერგვა დაგეხმარება, მარტივი და ჯანსაღი კერძები ყველაზე დაკავებულ დღეებშიც კი სწრაფად გააკეთო.

ძალიან მალე ამ რჩევების გამოყენება შენთვის ბუნებრივი გახდება და სადილისწინა "რა მოვამზადო?" კრიზისიც წარსულს ჩაბარდება.

1. გაავსე მაცივარი თევზით

ამერიკის კარდიოლოგიური ასოციაცია კვირაში თევზის მინიმუმ ორი ულუფის მირთმევას უწევს რეკომენდაციას.

"ამის გასაკეთებლად ისეთი თევზი შეარჩიე, რომელიც პირდაპირ შეგიძლია გადაიტანო მაცივრიდან ღუმელში", — ამბობს ჩიკაგოელი დიეტოლოგი ვიკი შანტა რეტელნი. როგორც წესი, გაყინულ თევზს გალღობა სჭირდება მომზადებამდე, მაგრამ "ზოგიერთი ბრენდი უკვე დამარინადებულია და ცალკეა შეფუთული, ამიტომ პირდაპირ შეიძლება მათი შეწვა გაყინული მდგომარეობით", — აცხადებს ის (მოძებნე შეფუთვაზე წარწერები "არ სჭირდება გალღობა" ან "მაცივრიდან ღუმელში").

კიდევ ერთი ჭკვიანური ხრიკი: აიღე შემწვარი, აქერცლილი და გაყინული კრევეტები (დაბალკალორიული ცილის მშვენიერი წყარო), მერე რომ სწრაფად გააცხელო და დაუმატო პასტას, კარტოფილს ან სალათებს.

2. მცირეოდენი ინგრედიენტები წინასწარ მოამზადე

ბოსტნეულის, ცილოვანი საკვებისა და მარცვლეულის ინგრედიენტების მთელი კვირისთვის წინასწარ შემზადება თუ გიყვარს, ძალიანაც კარგი, მაგრამ ეს თუ რამე ისეთია, რაც გაშინებს ან გღლის, გამოტოვე.

"საკვების ინგრედიენტების წინასწარ შემზადება ზოგჯერ საკმაოდ დამღლელია", — ამბობს ემი გორინი, ნიუ-იორკელი დიეტოლოგი. ნაცვლად ამისა, ის გვირჩევს, შესამზადებელ სამუშაოებს ცოტათი მოვუკლოთ და, მაგალითად, კვირა დღეს მხოლოდ ის ინგრედიენტები გავამზადოთ, რომლებსაც კვირის განმავლობაში გამოვიყენებთ კერძებში. მაგალითად, თვითონ დიეტოლოგი წინასწარ ჭრის ხოლმე სოკოსა და ხახვს, რომ ყოველთვის ხელთ ჰქონდეს ისინი კარტოფილისთვის ან ომლეტისთვის — ამგვარად თან თავიდან იშორებ ყველაფრის წინასწარ შემზადების დაღლას, თან არც ნულიდან გიწევს სადილის მომზადება.

3. მიმართე მოკლე გზებს

ფაქტი: სინამდვილეში, კაკლის მარცვლების გასუფთავება, დაჭრა და დაჭყლეტა არავის უყვარს. არც ნივრის ან კომბოსტოს გაფცქვნაზე გიჟდება ვინმე. ამიტომაცაა ზოგჯერ მაღაზიაში ნაყიდი მზა პროდუქტი ნამდვილი მხსნელი.

"შეიძლება, ცოტა უფრო ძვირი იყოს, მაგრამ გრძელვადიან პერსპექტივაში მაღაზიაში ნაყიდი პროდუქტი დროსაც გაგებინებს და უფრო ჯანსაღად კვებაშიც გეხმარება", — ამბობს ლინდსი ლივინგსტონი, ოჰაიოელი დიეტოლოგი.

შეეცადე, კრეატიულად მომზადებული ბოსტნეული მოძებნო, მერე რომ ცოტა უფრო გაახალისო კერძები, მაგალითად, სპირალური სტაფილოები და ყაბაყები, დანაკუწებული ბრიუსელის კომბოსტო ან ყვავილოვანი კომბოსტოს შეფუთული მარცვლები.

4. მოამზადე სმუზი

რა სჯობს დაბლენდერებულ და მზა სმუზის, როდესაც სახლიდან სასწრაფოდ გიწევს გასვლა? წინასწარ გაავსე პატარა კონტეინერი ხილით, არაქისის კარაქითა და სხვა დანამატებით (მაგალითად, ქოქოსი, მწვანე ბოსტნეული, შოკოლადის ფხვნილი, თხილი). მომდევნო დილას ამ ყველაფერს ბლენდერში უძახე და მცირეოდენი სითხეც დაუმატე გემოვნებით (რძე, ქოქოსის წყალი, კეფირი).

გორინს მაცივარში ყოველთვის მოეპოვება გაყინული ველური ლურჯი მოცვი (ერთი კვლევის თანახმად, ველურ ლურჯ მოცვს ორჯერ მეტი ანტიოქსიდანტი აქვს, ვიდრე ხელოვნურად გამოზრდილს), რომელსაც ურევს ბერძნულ იოგურტთან, რძესთან, არაქისის კარაქთან, ბანანსა და მცირეოდენ ნეკერჩხლის სიროფთან.

5. ყოველთვის ხელთ იქონიე წასაღები საკვები

ისეთი დღეებიც არის ხოლმე, სახლში რომ მოდიხარ და ისე ძალიან გშია, რომ სასწრაფოდ რაიმეს შეჭმა გჭირდება. ყოველთვის იქონიე ხელთ რამე სწრაფადმომზადებადი 10-წუთიანი ბურღულეული, მაგალითად, ბულგური ან ქერი, ამბობს რეტელნი. მერე ეგ შეურიე საჭმელად მზა სალათს და ცოტა თევზეულიც დაამატე, მაგალითად, წინასწარ შემზადებული თინუსი ან ორაგული. ასეთი საკვები სწრაფად მზადდება და ამ გზით შეგიძლია ჯანსაღად იკვებო, სიჩქარისა თუ სხვა ფაქტორებისგან განურჩევლად.

ალაბამელი დიეტოლოგი ჰოლი გრეინჯერი კიდევ რამდენიმე საკვანძო ინგრედიენტს გვთავაზობს, რომელიც უმჯობესია, ყოველთვის გვქონდეს სახლში. ესენია: კვერცხები, დაკონსერვებული ლობიო, გაყინული შემწვარი ქათამი, სპაგეტის სოუსი, ჰუმუსი, ბოსტნეული, ლაფშა და გაყინული პიცა.

ჯანსაღი ცხოვრების წესის, ფიზიკური და მენტალური ჯანმრთელობის შენარჩუნებაში Fitpass დაგეხმარებათ. მხოლოდ ერთი ბარათით თქვენ შეგიძლიათ, ერთდროულად სხვადასხვა სპორტული მიმდინარეობით დაკავდეთ და 100-ზე მეტი სპორტული დაწესებულების სერვისებით ისარგებლოთ. ფიტპასი საუკეთესო გზაა თანამშრომლების მოტივაციისთვის, ლოიალურობისა და პროდუქტიულობის გასაზრდელად.