უსაფრთხოების შესახებ ახალი კანონის ფარგლებში ჰონგ-კონგის საჯარო ბიბლიოთეკებიდან შესამოწმებლად მოხმარებიდან ამოიღეს პრო-დემოკრატიული და პეკინის მაკრიტიკებელი ავტორების წიგნები. როგორც ოფიციალური უწყებები აცხადებენ, წიგნების შინაარსი კანონთან შესაბამისობაზე უნდა შეამოწმონ.

ბოლო პერიოდში ჰონგ-კონგის ახალი საპროტესტო ტალღა სწორედ უსაფრთხოების კანონს უკავშირდება. როგორც დემონსტრანტები და მათი ლიდერები აცხადებენ, აღნიშნული კანონი ავტონომიას ზღუდავს და პრინციპს "ერთი ქვეყანა — ორის სისტემა" არღვევს.

სხვადასხვა საკითხის გარდა, აღნიშნული კანონი სეპარატიზმის მოწოდებისთვისა და სიძულვილის გაღვივებისთვის ადამიანს სამართლებრივ პასუხისმგებლობას აკისრებს.

ჰონგ-კონგის საჯარო ბიბლიოთეკებიდან ამოღებულია დემონსტრაციების ერთ-ერთი ლიდერის, ჯოშუა ვონგის ორი წიგნი. ასევე, ხელმიუწვდომელია პოლიტიკური თეორეტიკოსის, ჩინ ვანის ექვსი ნაშრომი, რომელიც ჰონგ-კონგის ავტონომიას ეხება.

"კანონი ეროვნული უსაფრთხოების შესახებ აწესებს ცენზურას როგორც კონტინენტურ ჩინეთში, ისე ამ საერთაშორისო ფინანსურ ქალაქში. მიუხედავად იმისა, რომ ჩემი წიგნები ბევრად უფრო ადრე გამოქვეყნდა, ვიდრე ექსტრადიციის შესახებ კანონის წინააღმდეგ აქციები დაიწყებოდა, ისინი მაინც ცენზურას დაექვემდებარა", — განაცხადა ჯოშუა ვონგმა.

ჰონგ-კონგის აღმასრულებელი საბჭოს წევრი, ტონგ კა-ვა ამბობს, რომ ბიბლიოთეკებიდან წიგნების ამოღება არავის უფლებას არ არღვევს.

"არასწორი და უკანონო იქნება სახელმწიფო დაწესებულებებს წაეხალისებინათ ისეთი ტექსტების კითხვა, რომელსაც შეუძლია ადამიანს კანონის დარღვევისკენ უბიძგოს, ამიტომაც არ მიმაჩნია, რომ მათი ბიბლიოთეკიდან ამოღება არასწორია", — განაცხადა მან.

ეროვნული უსაფრთხოების შესახებ კანონი ძალაში 30 ივნისს შევიდა. როგორც კანონის კრიტიკოსები ამბობენ, ის ფართომასშტაბიან უფლებას აძლევს ჩინეთის ხელისუფლებას, რომ ჰონგ-კონგის ავტონომიაში ადამიანის უფლებები შეზღუდოს. ამავე დროს, ჩინეთის ხელისუფლება ამტკიცებს, რომ კანონი საგარეო ჩარევისგან ქვეყნის დაცვისთვისაა აუცილებელი.

კანონის ძალაში შესვლის შემდეგ დიდი ბრიტანეთის პრემიერმინისტრმა, ბორის ჯონსონმა დაადასტურა, რომ ჰონგ-კონგის იმ მოქალაქეებისთვის, რომლებსაც ბრიტანეთის ზღვისიქითა პასპორტი აქვთ, საიმიგრაციო სისტემა შეიცვლებოდა. მათ საშუალება ექნებათ, ბრიტანეთში ცხოვრებისა და მუშაობის დამატებითი უფლება მოიპოვონ და რამდენიმე წელში მოქალაქეებიც გახდნენ.