პოლიტიკური ცენტრი გირჩი საქართველოს პრეზიდენტს გიორგი მარგველაშვილს, პრემიერმინისტრს გიორგი კვირიკაშვილს და პარლამენტის თავმჯდომარეს ირაკლი კობახიძეს კიდევ ერთხელ მიმართავს და ახსენებს თავის გეგმას 31 დეკემბერთან დაკავშირებით:

"მოგეხსენებათ, რომ 2016 წლის 31 დეკემბერს ჩვენ, პოლიტიკური პარტია გირჩის დამფუძნებლებმა თანამოაზრეებთან ერთად, თუ მანამდე კანონმდებლობა არ შეიცვალა, საჯაროდ უნდა დავარღვიოთ სისხლის სამართლის კოდექსის 265-ე მუხლი, რომელიც ითვალისწინებს თავისუფლების 12 წლამდე აღკვეთას".

გირჩი აქციის შესაძლო შედეგებზე ხელისუფლებაში მყოფ პირებს საკუთარ მოსაზრებას უზიარებს და დასძენს, რომ ქართული საზოგადოების ყველა ჯგუფი, მათ შორის პარლამენტის წევრები, ყველაზე ხშირად მოიხმარს კანაფს და ასევე სხვა აკრძალულ ნივთიერებებს:

"ჩვენ არ გვეგულება ქართული საზოგადოების არც ერთი ჯგუფი, პარლამენტის წევრები, სტუდენტები, ხელოვანები, ბანკების თანამშრომლები, საჯარო მოხელეები, სოფლის მეურნეობით დაკავებული ადამიანები, უნივერსიტეტების პროფესორები, სოფლად თუ ქალაქად, რომლის წევრები არ არიან აკრძალული ნივთიერებების, ყველაზე ხშირად კი კანაფის მომხმარებლები".

გირჩის თქმით, ხელისუფლების მიერ აკრძალული ნივთიერებების მომხმარებლები ამ ქვეყანაში ძალიან ბევრნი არიან:

"ვართ ძალიან ბევრნი, დაახლოებით 8-ჯერ მეტი, ვიდრე საქართველოს ჯარი, ოთხჯერ მეტი,ვიდრე ბაღებისა და სკოლების მასწავლებლები, თითქმის სამჯერ მეტი, ვიდრე საჯარო მოხელეები. თქვენ ახერხებდით შეშინებულ ადამიანებზე სათითაოდ ნადირობას , მაგრამ შეუძლებელია ჩვენთან ღიად დაპირისპირება".

პარტია აცხადებს, რომ მათ აქვთ ზუსტი ინფორმაცია, რომ მათი მიმართვის ადრესატებიდან ერთ-ერთი, დღემდე არღვევს კანონს და მარიხუანას მოიხმარს.