ავსტრიის საპრეზიდენტო არჩევნების მეორე ტურში, რომელსაც მთელი ევროპა განსაკუთრებით ელოდა, დამოუკიდებელმა კანდიდატმა, მწვანეთა პარტიის ყოფილმა ლიდერმა, ალექსანდერ ვან დერ ბელენმა გაიმარჯვა. ეგზიტპოლის შედეგების მიხედვით, რომელიც ავსტრიის საზოგადოებრივმა მაუწყებელმა გამოაქვეყნა, პრეზიდენტობის ულტრამემარჯვენე კანდიდატი, პოპულისტი ნორბერტ ჰოფერი დამარცხდა. არჩევნების წინასწარი შედეგები ორშაბათს გამოცხადდება. ჰოფერმა კონკურენტს გამარჯვება უკვე მიულოცა.

ჰოფერის მეორე ტურში გადასვლა განიხილებოდა ევროპაში ულტრამემარჯვენე ძალების გაძლიერების ტალღის ნაწილად. ჰოფერი მხარს უჭერს მიგრანტების წინააღმდეგ მკაცრ რეგულაციებს, ასევე, ის ცნობილია თავისი ევროსკეპტიკური შეხედულებებით. მიუხედავად იმისა, რომ ავსტრიის პრეზიდენტის პოსტი სიმბოლურია, სწორედ ევროპასა და აშშ–ში შექმნილი გარემოებების გამო გახდა პოლიტიკურად მნიშვნელოვანი, თუ რა იდეოლოგიის პოლიტიკოსი დაიკავებდა მას.