სახალხო დამცველი, ნინო ლომჯარია ამბობს, რომ მთავარი არხის თანამფლობელის, ბრალდებულ გიორგი რურუას საქმეში პრობლემურია და კითხვის ნიშნებს წარმოშობს ობიექტური, ან ნეიტრალური მტკიცებულებების არარსებობა. ომბუდსმენის თქმით, ისინი გაეცნენ რურუას საქმის მასალებს და დაასკვნეს, რომ ნეიტრალური მტკიცებულებით ვერ დასტურდება პირის მიერ იარაღის ფლობა. ამაზე ნინო ლომჯარიამ დღეს, 25 ივნისს პარლამენტის ადამიანის უფლებათა დაცვის კომიტეტზე ისაუბრა:

"მოწმეები არიან მხოლოდ პოლიციელები და ბუნებრივია, გიორგი რურუას მხარე ამბობს, რომ ასეთ ფაქტს ადგილი არ ჰქონია, მეორე მხარე ამბობს, რომ უპოვეს მას იარაღი. არ გვაქვს ვიდეოჩანაწერი, ან დამოუკიდებელი, ობიექტური მოწმის ჩვენებები, რომელიც შეესწრო ან დაასწრეს ჩხრეკას. ეს არის შეფასებითი კატეგორია. რამდენად დამაჯერებელია ეს მტკიცებულებები, ამაზე გადაწყვეტილება უნდა მიიღოს სასამართლომ. ამ შეფასებაში სახალხო დამცველი ვერ შევა. მიმაჩნია, რომ ეს არის ამ საქმის სუსტი მხარე, რომ ყოფილიყო ობიექტური მტკიცებულებები, მათ შორის, ვიდეოჩანაწერები".

ომბუდსმენი ამბობს იმასაც, რომ დაადგინეს დარღვევა ბიოლოგიური მასალის აღების დროს, როცა ადვოკატს არ მისცეს პროცედურაზე დასწრების შესაძლებლობა.

გიორგი რურუა ერთ-ერთია იმ პატიმრებს შორის, რომლის გათავისუფლებასაც ოპოზიცია 8 მარტის შეთანხმების ფარგლებში მოითხოვდა. ნაციონალური მოძრაობა და ევროპული საქართველო აცხადებენ, რომ ის პოლიტიკური ნიშნითაა დაკავებული და მისი გათავისუფლების გარეშე საკონსტიტუციო ცვლილებებს მხარს არ დაუჭერენ.

გიორგი რურუა 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

მოგვიანებით პროკურატურამ გიორგი რურუას ბრალი დაუმძიმა. პროკურატურის განცხადებით, ბრალს დაემატება ახალი მუხლი სასამართლო გადაწყვეტილების შეუსრულებლობისა და მისი შესრულებისათვის ხელის შეშლის შესახებ. ბრალდების მხარე აცხადებს, რომ გიორგი რურუამ უარი განაცხადა სასამართლოს განჩინების მიხედვით დნმ-სა და ხელის კვლევების ნიმუშის აღების თაობაზე. მიმდინარე წლის 15 იანვარს კი გამომძიებელმა განაცხადა, რომ რურუასგან დნმ-ის ნიმუში ნებაყოფლობით აიღეს.