თურქმენეთის პრეზიდენტი, გურბანგული ბერდიმუჰამედოვი თავისი დაბადების დღის გამო მოსკოვში აღლუმს არ დაესწრება. როგორც სახელისუფლებო თურქმენული გამოცემა წერს, ამის შესახებ მან რუსეთის პრეზიდენტ ვლადიმერ პუტინს ტელეფონით შეატყობინა.

მეორე მსოფლიო ომში გამარჯვების 75 წლისთავისთვის მოსკოვში აღლუმი 24 ივნისს გაიმართება. გამოცემა აღნიშნავს, რომ თურქმენეთის პრეზიდენტს 29 ივნისს 63 წელი შეუსრულდება და წინასწარმეტყველი მუჰამედის ასაკს მიაღწევს.

"ეროვნული ტრადიციის თანახმად, მიღებულია, რომ აღნიშნული თარიღი ოჯახთან, ახლობლებთან და მთელ ერთან ერთად უნდა აღინიშნოს", — წერს სახელისუფლებო გამოცემა.

როგორც გამოცემა წერს, ბერდიმუჰამედოვმა პუტინს განუმარტა, რომ კორონავირუსის პანდემიის გამო თურქმენეთში დაბრუნების დროს ის იძულებული იქნება, ორკვირიან იზოლაციაში წავიდეს, რის გამოც ოჯახთან ერთად დაბადების დღეს ვეღარ აღნიშნავს. მის ნაცვლად კი აღლუმზე თავდაცვის მინისტრი გაემგზავრება.