რამდენიმე დღის წინ ლოს-ანჯელესში გამართულ აუქციონზე საკულტო როკშემსრულებლის კურტ კობეინის გიტარა რეკორდულ ფასად — $6.01 მილიონად გაიყიდა.

მსაგსი ნივთის გაყიდვის წინა რეკორდი გასულ წელს დაფიქსირდა, როცა Pink Floyd-ის წევრის, დევიდ გილმორის გიტარა აუქციონზე $3.95 მილიონად შეიძინეს.

კურტ კობეინმა ეს ცნობილი გიტარა გადაცემა MTV Unplugged-ის ცოცხალი კონცერტების სერიაში გამოიყენა 1993 წელს. სწორედ ამ კონცერტის ფარგლებში როკმომღერალმა თავის ცნობილ კომპოზიციებთან ერთად დევიდ ბოუის სიმღერების ქავერებიც შეასრულა. ამ ლეგენდარული შესრულების ჩანაწერები კი მომღერლის გარდაცვალების შემდეგ გამოქვეყნდა, რომელმაც გრემის ჯილდოც კი დაიმსახურა 1996 წელს.

მუსიკალურ ინტრუმენტთან ერთად აუქციონზე გამარჯვებულ პიროვნებას ასევე გადაეცა გიტარის სხვა აქსესუარები და ნივთები, რომლებიც კურტ კობეინს ეკუთვნოდა და რაღაც დროის განმავლობაში იყენებდა მათ: ჩასადები ყუთი, სიმები და ა.შ.

აღსანიშნავია, რომ ამავე აუქციონზე გაიყიდა Nirvana-ს ალბომ Nevermind-ის პოსტერი ავტოგრაფით 56 250 დოლარად და 1992 წელს ჟურნალ Spin-სთვის ამავე ჯგუფის ფოტოსესიის ნეგატივები 35 200 დოლარად.

ამერიკული როკჯგუფი Nirvana 1987 წელს შეიქმნა და მსოფლიო პოპულარობის მოპოვება მალევე მოახერხა. მრავალი გავლენიანი მუსიკალური ჯილდოს ფლობასთან ერთად ეს ჯგუფი ისტორიაში ერთ-ერთი ყველაზე გაყიდვადი ბენდიცაა, რომელსაც დღემდე მილიონობით ერთგული მსმენელი ჰყავს.