იუსტიციის უმაღლესი საბჭოს არამოსამართლე წევრი, ნაზი ჯანეზაშვილი ალეკო ელისაშვილს ეხმაურება, რომელმაც თქვა, რომ ჯანეზაშვილი და გვრიტიშვილი ანა დოლიძეს ერთნაირად უტევენ.

საქმე იმაშია, რომ ჯანეზაშვილმა დოლიძე პოლიტიკურ საქმიანობაში ჩართვის გამო გააკრიტიკა და თქვა, რომ რადგან ის იუსტიციის უმაღლესი საბჭოს არამოსამართლე წევრია, პოლიტიკური საქმიანობით კანონს არღვევს. ალეკო ელისაშვილი კი ანა დოლიძეს მას შემდეგ გამოესარჩლა, რაც მასთან ერთად პოლიტიკური პლატფორმა შექმნა.

ნაზი ჯანეზაშვილი ელისაშვილის განცხადებას TV პირველის ეთერში გამოეხმაურა. იუსტიციის უმაღლესი საბჭოს არამოსამართლე წევრი ამბობს, რომ ელისაშვილმა საერთოდ არ იცის სასამართლოს თემა და პრობლემების შესახებაც პირადად მისგან გაიგო.

"ძალიან მიკვირს, რომ ალეკო ელისაშვილი, რომელმაც არ იცის საერთოდ სასამართლოს თემა, პირადად ჩემგან გაიგო სასამართლოს პრობლემები, მე მახსენებს, რომ თითქოს გვრიტიშვილთან უნისონში ვსაუბრობ. ეს არის სრულიად ამაზრზენი ჩემთვის, განსაკუთრებით იმ ადამიანისგან, რომელიც აბსოლუტურად არაინფორმირებულია ჯერ იმის შესახებ, რა გავაკეთე მე აქ, იუსტიციის უმაღლეს საბჭოში და ვინ იყვნენ საერთოდ იუსტიციის უმაღლესი საბჭოს კლანის წევრები და მოსამართლეები, რომლებმაც სასამართლოს სერიოზული ზიანი მიაყენეს ამ ქვეყანაში, მან ეს პირადად ჩემი მეშვეობით გაიგო", — თქვა ჯანეზაშვილმა.

მან ასევე სიცრუე უწოდა ელისაშვილის განცხადებას იმის შესახებ, რომ მის ოფისში დადიოდა. ჯანეზაშვილის თქმით, ელისაშვილის ოფისში მხოლოდ ერთხელ, სხვებთან ერთად, საჯარო შეხვედრაზე იმყოფებოდა.

ამასთან, ნაზი ჯანეზაშვილი ამბობს, რომ ელისაშვილი პოლიტიკოსია და მისი ამგვარი განცხადებები საბჭოს წევრის დამოუკიდებლობაში ჩარევადაც შეიძლება აღიქვას.

"პოლიტიკოსს მხრიდან, როდესაც მე სასამართლო ხელისუფლების ერთ-ერთი წარმომადგენელი ვარ, როგორც არამოსამართლე წევრი, ჩემი განცხადებების, ჩემი საქმიანობის შეფასება მიმაჩნია, რომ ჩემს დამოუკიდებლობაში ჩარევადაც კი შემიძლია აღვიქვა", — თქვა ჯანეზაშვილმა.

იუსტიციის უმაღლესი საბჭოს არამოსამართლე წევრმა, ანა დოლიძემ, პარლამენტის დამოუკიდებელმა დეპუტატმა ლევან კობერიძემ და სამოქალაქო მოძრაობის ლიდერებმა, ალეკო ელისაშვილმა და ლევან იოსელიანმა ერთობლივი პოლიტიკური პლატფორმა შექმნეს.

იუსტიციის საბჭოს არამოსამართლე წევრი, ნაზი ჯანეზაშვილი ამბობს, რომ ეს უკანონოა. მისი აზრით, ანა დოლიძე დღესაც რომ გადადგეს იუსტიციის საბჭოს წევრის თანამდებობიდან, კანონი უკვე დარღვეული აქვს.

გარდა ამისა, არასამთვარობო ორგანიზაციებიც ამბობენ, რომ დოლიძის მიერ სამოქალაქო მოძრაობის დაფუძნება მის მიერ ამჟამად დაკავებულ თანამდებობასთან შეუთავსებელია. ამასთან დაკავშირებით რამდენიმე ორგანიზაცია ერთობლივ განცხადებას ავრცელებს და დოლიძეს მოუწოდებს, რომ თუ ის უახლოეს მომავალში პოლიტიკურ საქმიანობას აპირებს, გადაწყვეტილება თანამდებობის დატოვების შესახებ თავად და დროულად მიიღოს.