გირჩი წევრი, იაგო ხვიჩია ამბობს, რომ ოქტომბრის საპარლამენტო არჩევნებში მაჟორიტარობის კანდიდატს მხარს არ დაუჭერენ მხოლოდ იმის გამო, რომ ის ოპოზიციის კანდიდატია. როგორც მან რუსთავი 2-თან აღნიშნა, კანდიდატების შეთანხმებაში არ იღებენ მონაწილეობას, რადგან გირჩმა მაჟორიტარის დაყენებაზე უარი თქვა.

"ზოგადად, გვაინტერესებს ვის დააყენებს ოპოზიცია კანდიდატებად, ვისზე შეთანხმდებიან, იმიტომ რომ ჩვენ ყველა კანდიდატს მხოლოდ იმის გამო, რომ ოპოზიციის წევრია, მხარს ვერ დავუჭერთ", — თქვა ხვიჩიამ.

4 ივნისს ნაციონალურ მოძრაობაში განაცხადეს, რომ თბილისში 8 მაჟორიტარული ოლქიდან 6 ოპოზიციის კანდიდატებს დაუთმოს.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე დროს, ყოფილმა პრეზიდენტმა, მიხეილ სააკაშვილმა ოპოზიციას შესთავაზა, რომ არჩევნებზე ერთიანი სია წარადგინონ. აღნიშნული შეთავაზება ოპოზიციაში არ მოიწონეს და განაცხადეს, რომ პოლარიზაციას უფრო მეტად გააღრმავებს.