საქართველოს პარლემენტის ყოფილი თავმჯდომარის და ქართული ოცნების მოქმედი აღმასრულებელი მდივნის განცხადებით, "არავის არ სჯერა იმის, რომ დავუშვათ, ემოციურ ნიადაგზე ვიღაცა ცდილობს [გიორგი გაბუნიაზე] შურისძიებას. ამის შესახებ ირაკლი კობახიძემ ტელეკომპანია იმედის ეთერში ისაუბრა.

მან ასევე აღნიშნა, რომ ფაქტი ძალიან მძიმეა, რადგან ეხება ადამიანის სიცოცხლეს და პრინციპულად მნიშვნელოვანია, გამოძიება ბოლომდე იყოს მიყვანილი.

"გარდა იმისა, რომ აქ საუბარი იყო ადამიანის სიცოცხლეზე, ასევე, ბუნებრივია, ასეთ შესაძლო დანაშაულს შეიძლება გამოეწვია სტაბილურობის კუთხით პრობლემები, შეიძლება გამოეწვია საზოგადოებაში ვნებათაღელვა და შეიძლება, ესეც იყო, ბუნებრივია, მიზანი. არავის არ სჯერა იმის, რომ დავუშვათ, ემოციურ ნიადაგზე ვიღაცა ცდილობს შურისძიებას. თუ ამას ჰქონდა გარკვეული მიზანი, მიზანი იქნებოდა ბევრად უფრო მეტი, ვიდრე მხოლოდ, დავუშვათ, ერთი ადამიანის სიცოცხლის მიმართ რაღაცის გაკეთება", — თქვა მან.

კობახიძემ ასევე აღნიშნა, რომ "ყველაფერი არის გამოსაძიებელი, ასაწონ-დასაწონი" და ხელისუფლებას შესაბამისი რეაგირება უნდა ჰქონდეს. მისივე თქმით, "რაც მთავარია", აქამდე ეს რეაგირება იყო ზუსტი და სწორი.

"ამან შეგვაძლებინა ჩვენ, რომ თავიდან აგვეცილებინა ასეთი გაგრძელება მოვლენების, რაც იყო სავარაუდოდ დაგეგმილი", — აღნიშნა კობახიძემ.

15 ივნისს, ჯერ ტელეკომპანია ფორმულამ, შემდეგ კი მთავარი არხის გენერალურმა დირექტორმა, ნიკა გვარამიამ გაავრცელეს ინფორმაცია, რომ გიორგი გაბუნიას ლიკვიდაციას ჩეჩნეთის ლიდერი, რამზან კადიროვი გეგმავდა. გვარამიას თქმით, გაბუნიას რამდენიმე თვის განმავლობაში უთვალთვალებდნენ, საქმის გამოძიება კი თავდაპირველად უკრაინაში დაიწყო. გვარამია აღნიშნავს, რომ მას შემდეგ, რაც უკრაინელმა სამართალდამცავებმა საქმე საქართველოს გადმოსცეს, ქართულმა მხარემ ეს "დიდი ლობის" პროვოკაციად ჩათვალა.

"ჩვენი ინფორმაციით, იყო რამდენიმე ჯგუფი, რომელიც აკონტროლებდა მარშრუტს პირველ საფეხურზე. მოძრაობის დადგენის შემდეგ, მეორე საფეხურზე იყო შემოსული ქილერი, რომელსაც უნდა განეხორციელებინა, ასე ვთქვათ... ის, რასაც ქილერები ახორციელებენ ზოგადად და ის, რაც იყო დაგეგმილი", — თქვა გვარამიამ.

სახელმწიფო უსაფრთხოების სამსახურის ინფორმაციით, რუსეთის მოქალაქე შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში დააკავეს. თუმცა, უწყებაში არ აკონკრეტებენ საქმე ეხება თუ არა მთავარი არხის წამყვანის, გიორგი გაბუნიას დაგეგმილ ლიკვიდაციას.

გვარამიას განცხადებას გამოეხმაურა კადროვიც. ჩეჩნეთის ლიდერი კიდევ ერთხელ დაემუქრა ჟურნალისტს. ის აცხადებს, რომ "სჯობს მან მუხლებზე დაიჩოქოს და მომხდარისთვის ბოდიში მოიხადოს". გარდა ამისა, რამზან კადიროვმა გიორგი გაბუნიას ლიკვიდაციის დაგეგმვის საქმეზეც ისაუბრა და აღნიშნა: "თუ ვინმე ჩემი დავალებით მოქმედებს, ის მას შეასრულებს, თუ ჩუმადაა შესასრულებელი — ვერავინ გაიგებს".

გაბუნიას გინება პირდაპირ ეთერში — რა მოხდა

2019 წლის ივლისში, გიორგი გაბუნიამ, რომელიც მაშინ რუსთავი 2-ზე მუშაობდა, პირდაპირ ეთერში წამყვანმა რუსეთის პრეზიდენტ ვლადიმერ პუტინს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. მაშინდელმა გენერალურმა დირექტორმა, ნიკა გვარამიამ თქვა, რომ არხი კატეგორიულად არ იზიარებს გამოხატვის მსგავს ფორმას, მიუხედავად იმისა, რომ, შესაძლოა, პოზიციას ეთანხმებოდნენ. ამ ყველაფერს ტელევიზიასთან საპროტესტო აქციები მოჰყვა. ორგანიზატორები ითხოვდნენ, რომ გენერალურ დირექტორს, ნიკა გვარამიასა და ჟურნალისტს გიორგი გაბუნიას არხი დაეტოვებინა.

საქართველოს მთავრობის წარმომადგენლებმა გიორგი გაბუნიას განცხადება ქვეყნის წინააღმდეგ ომად შეაფასეს. კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე". რამდენიმე საათში საქართველოს საგარეო საქმეთა სამინისტრომ საერთაშორისო ორგანიზაციებს "ამ ქცევის" შეფასება სთხოვა.

პატრიოტთა ალიანსის წევრმა, ადა მარშანიამ გაბუნიას დაპატიმრება მოითხოვა და ამისთვის მთავარ პროკურორს, შალვა თადუმაძეს მიმართა.

გინებას გამოხმაურება მოჰყვა რუსულ მედიაშიც. ოკუპანტ ქვეყანაში წამყვანის ქცევა პროვოკაციად შეაფასეს. დუმის დეპუტატები ჟურნალისტის სამართლებრივ დასჯას და მის რუსეთში ექსტრადირებას ითხოვდნენ. განცხადება გააკეთა პუტინმაც და თქვა, რომ "ასეთი ადამიანების წინააღმდეგ საქმის აღძვრა დიდი პატივია".

"ვიღაც გამოვიდა, რაღაც წამოროშა, საკუთარი თავის რაღაცად წარმოსაჩენად. მის შესახებ არავინ არაფერი იცოდა, ახლა ყველა მასზე ლაპარაკობს", — თქვა პუტინმა გაბუნიაზე.

ბოდიშის მოხდა და დევნის დაწყება კი ჩეჩნეთის ლიდერმა, რამზან კადიროვმა მოითხოვა. მან გაბუნიას გადამალვა ურჩია, "რადგან მსოფლიოში არის მილიონობით ახალგაზრდა, რომელთაც უყვართ პუტინი" და "პირველივე შემხვედრი გაუკეთებს მას იმას, რაც დაიმსახურა".