საგარეო საქმეთა მინისტრმა, მიხეილ ჯანელიძემ ევროპარლამენტში ოფიციალური ვიზიტისას განაცხადა, რომ საქართველოსთვის გასაგებია ევროკავშირისთვის დღეს არსებული გამოწვევები, თუმცა მისივე თქმით, ასევე გასათვალისწინებელია, თუ რა ფასი აქვს "ყოვლად გაუმართლებლად გვიან მიღებულ გადაწყვეტილებებს", რომლებიც საერთო ვალდებულებების შესრულებას შეეხება.

ამის შესახებ, ჯანელიძემ კონფერენციაზე, სავიზო რეჟიმის ლიბერალიზაცია, როგორც ევროკავშირის საგარეო პოლიტიკის ინსტრუმენტი განაცხადა:

"ჩვენ სრულად აღვიქვავთ იმ სირთულეებს, რომლის წინაშეც დღეს დგას ევროკავშირი გაზრდილი მიგრაციული ნაკადის, პოპულიზმისა და ექსტრემისტული იდეოლოგიის გავლენის გამო. თუმცა, ჩვენ ასევე უნდა გავითვალისწინოთ ისიც, თუ რა ფასი აქვს ყოვლად გაუმართლებლად გვიან მიღებულ გადაწყვეტილებებს, რომლებიც საერთო ვალდებულებების შესრულებას შეეხება. ევროსკეპტიკური განწყობების გაღვივება საქართველოში, რომელიც ევროკავშირის ერთგული და მტკიცე პარტნიორია, ძნელად თუ დაეხმარება ევროკავშირს დაძლიოს პესიმიზმი თავის მოქალაქეებში. გასაკვირი არაა, რომ მრავალწლიანი რეფორმებისა და ამ ურთულეს გზაზე მიღწეული პროგრესის შემდეგ, საქართველოში საკმაოდ მაღალია ლეგიტიმური მოლოდინები. ამას ჩვენთვის უზარმაზარი სიმბოლური, პოლიტიკური და პრაქტიკული მნიშვნელობა გააჩნია და წარმოადგენს ევროკავშირის პოლიტიკური მხარდაჭერის დადასტურებას".

ჯანელიძის განცხადებით, საქართველოსთან მიმართებაში ვიზალიბერალიზაცია არავითარ შემთხვევაში არ არის დაკავშირებული დამატებით მიგრაციულ რისკებთან, არამედ ეს ხელს შეუწყობს ხალხთა შორის კონტაქტების დამყარებას, კულტურულ და ბიზნეს კავშირებისა და პარტნიორობის გაძლიერებას:

"ქართველები კვლავ იხსენებენ საბჭოთა დროს, როდესაც 37 რუბლად დაფრინავდნენ მოსკოვში ყველანაირი დაბრკოლების გარეშე. ჩვენ უნდა დავანგრიოთ ეს სტერეოტიპი და ვიმუშაოთ, რათა ევროპა და ევროპის ქვეყნების დედაქალაქები გახდეს ხელმისაწვდომი საქართველოს მოსახლეობისათვის. ნაცვლად იმისა, რომ ვსარგებლობდეთ ყველა ამ შესაძლებლობით, ჩვენ ვაწყდებით ევროკავშირთან მოლაპარაკებების გაჭიანურებულ პროცესს, ევროკავშირისა და ევროკავშირის წევრი ქვეყნების შიდა და საგარეო პოლიტიკასთან დაკავშირებულ შეფერხებებს. როგორც არ უნდა იყოს, ჩვენ ვართ იმ ინტერ-ინსტიტუციონალური დებატების მძევლები, რომელიც არ ასახავს პარტნიორულ ურთიერთობებს. მოდით იმედს ნუ გავუცრუებთ ჩვენს ხალხს, მოდი შევინარჩუნოთ მათი მოტივაცია გააგრძელონ ურთულესი რეფორმები".

29 ნოემბერს, განახლებული შეჩერების მექანიზმზე ევროკავშირის საბჭო, კომისია და პარლამენტი ისევ ვერ შეთანხმდა. სავარაუდოდ, მსგავსი შეხვედრა მომავალ კვირასაც გაიმართება.

ამასთან, ევროპარლამენტის ოფიციალურმა საიტმა შეჩერების მექანიზმის განხილვის სავარაუდო თარიღი - 2017 წლის 18 იანვარი გამოაქვეყნა.

რა არის შეჩერების მექანიზმი?

შეჩერების გამარტივებული მექანიზმის ამოქმედება, ევროკავშირის წევრ ქვეყნებში, საჭიროების შემთხვევაში ჭარბ მიგრაციულ ნაკადებს შეაჩერებს. იგი საშუალებას აძლევს წევრ ქვეყნებს, რომ ევროკომისიას მოთხოვოს დროებით შეაჩეროს უვიზო მიმოსვლა იმ ქვეყნისთვის, საიდანაც მკვეთრად გაიზრდება არალეგალი მიგრანტების რაოდენობა და თავშესაფრის მოთხოვნები. ევროკავშირის განცხადებით შეჩერების მექანიზმი არის "აუცილებელი" და საქართველო ვერ მიიღებს სავიზო ლიბერქალიზაციას მის ამოქმედების გარეშე.