გამარჯვებული საქართველოს ლიდერი ირაკლი ოქრუაშვილი აცხადებს, რომ მაჟორიტარობის კანდიდატი არ იქნება, არც თბილისში და არც სხვაგან. მისი განმარტებით, თბილისის მაჟორიტარობაზე უარი თქვა, რადგან დარჩენილი იყო 6 მანდატი, რომელიც 5 პარტიას კი 7 კანდიდატზე უნდა გაეყო. მისი განმარტებით, ამას ოპოზიციის ერთობის შესანარჩუნებლად აკეთებს.

"6 მანდატს 7-ზე ვერ გავყოფდით ბუნებრივია, იმიტომ, რომ ერთი არის მეტი. ერთ ადამიანის პრობლემა არსებობს. ამ შემთხვევაში, უნდა განმეხილა, რომ ერთი ადამიანი მე ვარ. მე ჩემს საკითხს ვხსნი საერთოდ ამ დღის წესრიგიდან და დარჩება 6 ადამიანი, 6 მანდატზე. პრობლემა იქნება დახურული, რომ ჩვეულებრივად გაიყოფა.

მე ამით მაქსიმალურად ვცდილობ, ხელი შევუწყო ერთობას. ეს ერთობა არის ჩვენი საზოგაოდოების მოთხვონას, ერთობის გარეშე ხელისუფლების ცვლილება იქნება შეუძლებელი", — განაცხადა მან TV პირველის ეთერში.

ოქრუაშვილის განმარტებით, ის "არც სხვა ოლქებში გახდის საპრობლემოს" მის კანდიდატურას, მათ შორის არც გორში. კითხვაზე, ნიშნავს თუ არა ეს, რომ მას გარანტირებული ადგილი აქვს მოპოვებული პარტიულ სიაში, ოქრუაშვილი პასუხობს:

"პროპორციულ არჩევნებში ისედაც მივიღებ მონაწილეობას. პირიქით, უფრო მინუსში გადამყავს ჩემი თავი, ამას შეიძლება ასე შევხედოთ, მაგრამ ამას ვაკეთებ ერთობისთვის".

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

4 ივნისს ნაციონალურ მოძრაობაში განაცხადეს, რომ თბილისში 8 მაჟორიტარული ოლქიდან 6 ოპოზიციის კანდიდატებს დაუთმოს. ამავე დროს, პარტია წინასაარჩევნო კამპანიას თბილისის მხოლოდ ორ რაიონში — გლდანსა და სამგორში დაიწყებს.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: