სომხეთის პრემიერმინისტრის ნიკოლ პაშინიანის განცხადებით ქვეყანაში ეპიდემიოლოგიური სიტუაცია უარესდება და პაციენტების დროულ ჰოსპიტალიზაციას ვერ ახერხებენ. ბოლოს 24 საათში ქვეყანაში 697 ახალი შემთხვევა გამოვლინდა.

"ეს ნიშნავს იმას, რომ უკვე ვართ იმ სიტუაციაში, როცა არიან პაციენტები, რომელთაც ჰოსპიტალიზაცია ესაჭიროებათ, თუმცა დროულად ჰოსპიტალიზაცია არ შეგვიძლია", — განაცხადა პაშინიანმა ფეისბუქზე პირდაპირი ჩართვის დროს.

მისივე თქმით, მთავრობის შეფასებით, ქვეყანაში 20 ათასი ადამიანია, რომელმაც არ იცის, რომ კორონავირუსი აქვს. დადასტურებული შემთხვევების რიცხვმა კი 10 ათასს გადააჭარბა.

გარდა ამისა, ნიკოლ პაშინიანმა განაცხადა, რომ ბოლო ერთ დღეში კორონავირუსით ინფიცირებული კიდევ 6 ადამიანი გარდაიცვალა, ხოლო 9 ინფიცირებული სხვა მიზეზით გარდაიცვალა.

რამდენიმე დღის წინ კორონავირუსი დაუდასტურა ნიკოლ პაშინიანსა და მის ოჯახს. როგორც პრემიერმა აღნიშნა, დაავადება უსიმპტომოდ მიმდინარეობს.