ინფორმაციის თავისუფლების განვითარების ინსტიტუტის (IDFI) მიერ შსს-სგან მოპოვებული ინფორმაციით, 2013 წელს, იანვრიდან ოქტომბრის ჩათვლით, შინაგან საქმეთა სამინისტროს თანამდებობის პირებზე პრემიის სახით სულ გასცეს 6 969 892 ლარი, საიდანაც მათივე ცნობით, ყველაზე დიდი თანხა 880 736 გაიცა ოქტომბერში.

ფოტო: IDFI

IDFI-ის გამოკვლევის შედეგად დადგინდა, რომ 2013 წლის ნოემბრამდე, შინაგან საქმეთა სამინისტროს ცენტრალური აპარატის თანამდებობის პირებზე სულ გაცემულია 2 325 789 ლარი:

"მინისტრისგან განსხვავებით, სხვა თანამდებობის პირების შემთხვევაში უმეტესწილად პრემია გაიცემოდა ყოველთვიურად და მნიშვნელოვნად აღემატებოდა მათ ყოველთვიურ თანამდებობრივ სარგოს".

მინისტრის მოადგილეებზე 2013 წელს 10 თვეში გაცემულია დაახლოებით ნახევარი მილიონის ოდენობის პრემია:

  • ალექსანდრე ტაბატაძემ მიიღო, 113 500 ლარი,
  • ალექსი ბატიაშვილმა - 107 250 ლარი,
  • ლევან იზორიამ - 92 750 ლარი,
  • ვახტანგ გომელაურმა 8 თვეში 74 000 ლარი,
  • დავით ხუციშვილმა 69 750 ლარი,
  • გელა ხვედელიძემ 4 თვეში - 44 000 ლარი

IDFI ასევე მიუთითებს იმასაც, რომ ერთჯერადად მინისტრის მოადგილეებზე პრემიის სახით ყველაზე დიდი თანხა გაცემულია:

  • ალექსანდრე ტაბატაძის ივლისის პრემია - 22 000 ლარი,
  • ალექსი ბატიაშვილის 2013 წლის მაისის პრემია - 15 750 ლარი,
  • ლევან იზორიას პრემია - 13 250 ლარი.

გარდა ამისა, IDFI-ის დოკუმენტების თანახმად, 2013 წლის პირველ 10 თვეში, ცენტრალური აპარატის 8 დეპარტამენტის უფროსზე გაცემულია 377 250 ლარის ოდენობის პრემია, საიდანაც ყველაზე დიდი თანხა მიღებული ზვიად ჯანყარაშვილს -70 000 ლარი.

ხოლო, ერთჯერადად ცენტრალური აპარატის დეპარტამენტის უფროსებს შორის, ყველაზე დიდი თანხა მიღებული აქვს ავთანდილ თაბუნიძეს - აგვისტოს პრემია 18 750 ლარი და ირაკლი ჩიმაკაძეს - სექტემბრის პრემია 11 250 ლარი.

როგორც IDFI განმარტავს, შინაგან საქმეთა სამინისტროსგან მიღებული ინფორმაცია არ არის სრულყოფილი:

"შსს-მ მოგვაწოდა ინფორმაცია თანამდებობის პირებზე გაცემული პრემიების შესახებ 2013 წლის იანვრიდან - ოქტომბრის ჩათვლით. თუმცა, უწყებას ამ დროისთვის არ მოუწოდებია მონაცემები 2013 წლის ნოემბრისა და დეკემბრის თვეებში გაცემული პრემიების შესახებ. ამასთან, მიუხედავად IDFI-ის მოთხოვნისა, არ გაცემულა მონაცემები 2013 წლის განმავლობაში თანამდებობის პირებზე გაცემული დანამატების შესახებ".