საპარლამენტო უმცირესობის წარმომადგენელი ირმა ინაშვილი რუსთავი 2-თან საუბრისას ამბობს, რომ რუსთავი 2-ის საქმის გამოძიება უფრო ადრეული პერიოდიდან უნდა დაიწყოს, სანამ ტელეკომპანიაზე ქიბარ ხალვაში განაცხადებდა პრეტენზიას:

"საერთოდ რუსთავი 2-ის საქმის გამოძიება უფრო ადრე პერიოდიდან უნდა დაიწყოს. ისიც გამოსარკვევია, ქიბარ ხალვაშმა როგორ მიიღო ეს ტელევიზია, ესაა ჩემი პოზიცია, რომ გაირკვეს სიმართლე. არც ქიბარ ხალვაშს მიუღია ეს ტელევიზია კეთილსინდისიერად როგორც მე ვიცი".

ინაშვილის თქმით, ტელეკომპანიის საქმე, რომელიც 1 წელიწადზე მეტია სასამართლოში მიმდინარეობს და ამჟამად უზენაესი სასამართლოს დიდ პალატაზეა გადაცემული, იწვევს ეჭვს, რომ ხელისუფლების ინტერესებშია, თუმცა ამის სათქმელად დამატებითი არგუმენტებია საჭირო:

"ეჭვის საფუძველი რჩება რა თქმა უნდა, მაგრამ მტკიცებით ფორმაში არ შეიძლება ამაზე ლაპარაკი, მეტი არგუმენტებია საჭირო და მეტი მტკიცებულებები".

ნიკა გვარამიამ დღეს განაცხადა, რომ რუსთავი 2-ის საქმეზე გადაწყვეტილების მიღებამდე უზენაეს სასამართლოზე ზეწოლა ხორციელდება, რასაც ბიძინა ივანიშვილი სხვადასხვა ადამიანების დახმარებით ახერხებს. მათგან ერთ-ერთი კი მისი თქმით, იურიუდიულ კომიტეტში ეკა ბესელიას მოადგილე ვანო ზარდიაშვილია. ბრალდებას არასერიოზულს უწოდებს ეკა ბესელია.