საქართველოს პარლამენტი საკონსტიტუციო ცვლილებებისა და საარჩევნო რეფორმის საკითხის განხილვას იწყებს. კომისიის პირველი სხდომა დღეს, პირველ ივნისს დახურულ ფორმატში იმართება, საკითხს კი კენჭი თვის ბოლოს უნდა უყარონ. საყოველთაო სახალხო მსჯელობა 4 ივნისს, თბილისში დაიწყება და დისტანციურად ჩატარდება, ასეთივე მსჯელობა იგეგმება ბათუმშიც.

ოპოზიცია ამ პროცესში ჩართვაზე უარს აცხადებს, თუკი ხელისუფლება 8 მარტის შეთანხმებას ბოლომდე არ შეასრულებს. სერგი კაპანაძე აცხადებს, რომ გიორგი რურუას განთავისუფლება საარჩევნო სისტემის მხარდაჭერის წინაპირობაა.

"ჩვენი ინტერესი არის რომ საკონსტიტუციო ცვლილებები შევიდეს ძალაში, თუმცა პოლიტიკური პატიმრების გათავისუფლების გარეშე ჩვენი მხრიდან ეს არ მოხდება. რაც შეეხება უშუალოდ განხილვებში მონაწილეობას, ეს არის ტექნიკური ნაწილი. რეალურად, განხილვაც არ იქნება, ეს არის სატელევიზიო ჩართვები. ამასთან დაკავშირებით, ამ კვირაში, თუ შემდეგ კვირაში, მივიღებთ გადაწყვეტილებას, რა ფორმით ჩავერთვებით ამაში", — ამბობს სერგი კაპანაძე რუსთავი 2-თან საუბარში.

იგივე პირობა აქვთ ნაციონალურ მოძრაობაში. მათი პარტიის პოლიტიკური საბჭოს წევრი, ზურაბ მელიქიშვილი რუსთავი 2-თან ინტერვიუსას აცხადებს, რომ ვიდრე გიორგი რურუა არ გათავისუფლდება, მანამდე საკონსტიტუციო ცვლილებებს მხარდაჭერა არ ექნება.

საყოველთაო სახალხო განხილვის საორგანიზაციო კომისია ცხრა წევრისგან შედგება, მათ შორის იქნებიან:

  1. არჩილ თალაკვაძე;
  2. მამუკა მდინარაძე;
  3. ირმა ინაშვილი;
  4. სერგი კაპანაძე;
  5. მარიამ ჯაში;
  6. ირაკლი კობახიძე;
  7. თინათინ ბოკუჩავა;
  8. თენგიზ შარმანაშვილი (საქართველოს პარლამენტის თავმჯდომარის მრჩეველი);
  9. თორნიკე ჭეიშვილი (საქართველოს პარლამენტის თავმჯდომარის მრჩეველი. კომისიის მდივანი).