უკრაინაში საქართველოს ელჩი, თეიმურაზ შარაშენიძე ორკვირიანი კარანტინის შემდეგ საგარეო საქმეთა სამინისტროში კონსულტაციებისთვის მივიდა. როგორც მან ჟურნალისტებს განუცხადა, ის არ იზიარებს კრიტიკას, რომ საელჩომ ცუდად იმუშავა,

"გვქონდა კომუნიკაცია უკრაინის უმაღლეს დონეზე. მოგახსენეთ, რომ გადავეცით საპროტესტო ნოტა, პროტესტის ფორმად არჩეულ იქნა ელჩის გამოწვევა კონსულტაციებზე. ჩამოვედი და დღეს ვიწყებთ ამ კონსულტაციებს", — აღნიშნა შარაშენიძემ.

რაც შეეხება უკრაინაში მის დაბრუნებას, ელჩი ამბობს, რომ ამაზე გადაწყვეტილება ზემდგომი პირები იღებენ.

საქართველოს მთავრობამ უკრაინიდან კონსულტაციებისთვის ელჩოს გამოწვევა მას შემდეგ გადაწყვიტა, რაც პრეზიდენტ ვოლოდიმირ ზელენსკიმ საქართველოს ყოფილი პრეზიდენტი, მიხეილ სააკაშვილის რეფორმების საბჭოს ხელმძღვანელად დანიშნა.