საქართველოს პრეზიდენტის, სალომე ზურაბიშვილის დეკლარაციის მიხედვით, 2019 წელს მან 13 880 ლარი დახარჯა დიზაინერულ მომსახურებაში. დეკლარაცია პრეზიდენტმა 2020 წლის 30 იანარს შეავსო და მასში მითითებულია ხარჯები წინა წლის პირველი იანვრიდან 31 დეკემბრის ჩათვლით.

დეკლარაციის მიხედვით, პრეზიდენტს დიზაინერ ქეთევან ჩხიკვაძესთან გასავალი 7 280 ლარი, დიზაინერ სოფია ეცადაშვილთან კი 6 600 ლარი ჰქონდა.

ფოტო: კადრი სალომე ზურაბიშვილის დეკლარაციიდან

ამავე დოკუმენტში მითითებულია, რომ 2019 წელს ზურაბიშვილს ხელფასის სახით დაერიცხა 66 240 ლარი. თუმცა, მან პრეზიდენტის რანგში თავის პირველივე ბრიფინგზე აღნიშნა, რომ უარს ამბობდა საქართველოში თანამდებობრივ სარგოზე და ფრანგული პენსიით იცხოვრებდა.

დეკლარაციის მიხედვით, 2019 წელს, მას დაგროვებით პენსიის სახით შემოსავალი აქვს 30 280 ევრო. 2018 წელს მისი პენსია საფრანგეთში 39 847 ევრო იყო.

გარდა ამისა, მას მითითებული აქვს, რომ 2019 წელს ბინის გაქირავებით შემოსავლის სახით მიიღო 21 600 ევრო.

რაც შეეხება ქველმოქმედებას, აქ ზურაბიშვილს 74 520 ლარი და 8 000 დოლარი აქვს დახარჯული.