საქართველოს პრემიერმინისტრის, გიორგი გახარიას თქმით, საკონსტიტუციო ცვლილებები უნდა ჩატარდეს და ის შედგება. მისი განცხადებით ეს მმართველი გუნდის პოზიციაა და ყველაფერი დანარჩენი პოლიტიკური სპეკულაციაა.

"ვთვლი, რომ ის საარჩევნო სისტემა, რომელზეც მოხდა შეთანხმება, არის დღეს, დღევანდელ ეტაპზე, დღევანდელი ქვეყნის განვითარებისთვის უკიდურესად მნიშვნელოვანი და პრინციპული. ეს ჩემი პრინციპული პოზიციაა, რომელიც არაერთხელ დამიფიქსირებია, ისევე, როგორც მითქვამს, რომ პროპორციული საარჩევნო სისტემა არის ჩვენი ქვეყნის პოლიტიკური რეალობის და პოლიტიკური სივრცის შემდგომი რეფორმირებისა და დემოკრატიზაციისთვის აუცილებელი მომენტი", — თქვა გიორგი გახარიამ.

საკონსტიტუციო ცვლილებებთან დაკავშირებით ოპოზიციის ნაწილი აცხადებს, რომ კანონპროექტს მხარს არ დაუჭერენ, თუ 8 მარტის შეთანხმება ბოლომდე არ შესრულდება. მმართველი გუნდის ლიდერები კი იმედს გამოთქვამენ, რომ საჭირო ხმებს დამოუკიდებელი დეპუტატებისა და პატრიოტთა ალიანსის მხარდაჭერით მოაგროვებენ.