ოპოზიციის ერთ-ერთი ლიდერი, ირაკლი ოქრუაშვილი ამბობს, რომ ყოფილი პრემიერის, ვანო მერაბიშვილის ადგილს პოლიტიკაში საერთოდ ვერ ხედავს. ამის შესახებ მან ფორმულას ეთერში, გადაცემა პოლიტიკის ფორმულაში ისაუბრა. ოქრუაშვილმა აღნიშნა, ისიც, რომ მერაბიშვილმა, შეიძლება, მაქსიმუმ ერთი მაჟორიტარული ოლქი მოიგოს და "ამით დასრულდება მისი მწვერვალზე ასვლა".

წამყვანის კითხვაზე, იქნებოდა თუ არა ის მერაბიშვილის მაჟორიტარობის წინააღმდეგი, ოქრუაშვილი პასუხობს, რომ "ალბათ კი", თუ ეს შეეხება საერთო ოპოზიციური ფორმატით მის დასახელებას.

ვანო მერაბიშვილმა ციხე 20 თებერვალს დატოვა. მისი განცხადებით, პოლიტიკაში აქტიურად ჩართვას აპირებს და იბრძოლებს, რომ ეს რეჟიმი წელსვე ჩამოშორდეს საქართველოს.

ყოფილი ხელისუფლების პერიოდში, 2004 წელს ირაკლი ოქრუაშვილი შს მინისტრის თანამდებობაზე ვანო მერაბიშვილმა ჩაანაცვლა. მაშინ ოქრუაშვილი თანვდაცვის მინისტრად გადავიდა.

2006 წლის 10 ნოემბერს, მთავრობაში ცვლილებების შედეგად, ირაკლი ოქრუაშვილმა თავდაცვის მინისტრის პოსტი დატოვა და ეკონომიკური განვითარების მინისტრი გახდა. პრეზიდენტ სააკაშვილის სიტყვებით, ეს გადაადგილება "განაპირობა იმ ფაქტმა, რომ რუსეთის მთავარი სამიზნე საქართველოს ეკონომიკაზე შეტევაა". ერთი კვირის შემდეგ, 17 ნოემბერს, ოქრუაშვილმა ეკონომიკური განვითარების მინისტრის თანამდებობა თავისი სურვილით დატოვა.