ეკონომიკის მინისტრის, ნათია თურნავას განცხადებით, მთავრობას არ აქვს საფუძველი, რომ ანაკლიის განვითარების კონსორციუმს კიდევ ერთხელ ენდოს. მისი თქმით, პირველი შესაძლებლობისთანავე ისინი ახალ ტენდერს გამოაცხადებენ და საფინანსო ინსტიტუტებთან თანამშრომლობას განაახლებენ.

თურნავას განმარტებით, ქვეყნის ლოგისტიკური მდებარეობა არის ის უპირატესობა, რის გამოც ქვეყნებს აქ გადმოსვლა მოუნდებათ და ანაკლიაც კომერციულად უფრო მიმზიდველი იქნება.

"კონსორციუმს მრავალი წლის მანძილზე ჰქონდა ძალიან კარგი შანსი და ჩვენი მხარდაჭერა იმისთვის, რომ დადგენილ ვადებში, და თან ეს ვადები შვიდჯერ გადავუწეით, პროექტი დაეწყო და დაესრულებინა. სამწუხაროდ, ჩვენ არ გვაქვს საფუძველი, რომ მერვედ ვენდოთ კონსორციუმს. ეს საკითხი დახურულია", — აღნიშნავს თურნავა.

რამდენიმე დღის წინ ანაკლიის განვითარების კონსორციუმმმა განაცხადა, საქართველოს ეკონომიკის აღდგენის დასაწყებად ერთ-ერთი საუკეთესი მამოძრავებელი სტიმული ანაკლიის პორტისა და მისი მიმდებარე ეკონომიკური ზონების განვითარება იქნება.

კონსორციუმმა აღნიშნა, რომ კორონავირუსის პანდემიის გამო მთავრობასთან საარბიტრაჟო პროცესის დაწყება გადადო. ამასთან, ისინი მზად არიან თავიდან აირიდონ საარბიტრაჟო წარმოება და მთავრობასთან ერთად მოიზიდონ დამატებითი ინვესტიციები და მუშაობა გააგრძელონ.