ერთიანი ნაციონალური მოძრაობა ახალ მინისტრთა კაბინეტის შემადგენლობას პარლამენტში მხარს არ დაუჭერს. ამის შესახებ დღეს გამართულ ბრიფინგზე ელენე ხოშტარიამ განაცხადა:

"ამ ვითარებაში, ცხადია, ჩვენ არ და ვერ დავუჭერთ მხარს მთავრობის ამ შემადგენლობას. ჩვენი მთავარი ამოცანა ამ 4 წლის განმავლობაში იქნება გავაკეთოთ მაქსიმუმი, იმისთვის, რომ შევამციროთ ზიანი, რომელიც მიადგება საზოგადოებას ესეთი მთავრობის მხრიდან."

ხოშტარიას თქმით, ქართული ოცნება კმაყოფილია გასული ოთხი წლით და იგივე პოლიტიკის გატარება აპირებს, სინამდვილეში კი ბევრი მიმართულებით პოლიტიკა შესაცვლელია:

"ის გუნდი, ის კანდიდატები, რაც ჩვენ წარმოგვიდგინა ქართულმა ოცნებამ მეტყველებს იმაზე, რომ ხელისუფლება არის კმაყოფილი იმ ოთხი წლით, როდესაც ისინი იყვნენ ხელისუფლებაში. მათ არ ესმით არანაირი აუცილებლობა იმისა, რომ ქვეყანაში უნდა შეიცვალოს პოლიტიკა ბევრი მიმართულებით. იგივე გუნდის შეთავაზება ნიშნავს, რომ არაფრის შეცვლას აქ არსებითად არ აპირებენ. არც ერთ სფეროში არანაირი სიახლე."

გიორგი კვირიკაშვილმა პარლამენტს მინისტრთა კაბინეტის ახალი შემადგენლობა წარუდგინა დასამტკიცებლად. ცვლილება შეეხო მხოლოდ ოთხ უწყებას, ხოლო დანარჩენ სამინისტროებს ძველი მინისტრები დაუბრუნდებიან.