ამ ბოლო დროს სოციალური ქსელის გიგანტები აქტიურად საუბრობენ იმაზე, რომ ინტერნეტი დეზინფორმაციისგან უნდა გაიწმინდოს. სტენფორდის უნივერსიტეტმა გადაწყვიტა ჩაეტარებინა კვლევა იმის გამოსავლენად, შეუძლიათ თუ არა ბავშვებსა და ახალგაზრდებს ერთმანეთისგან განასხვავონ ყალბი და ნამდვილი ამბავი. სულ გამოიკითხა 7,804 რესპონდენტი.

შედეგები არცთუ სახარბიელო აღმოჩნდა. როგორც ჩანს, მოზარდებისა და ზრდასრულების უმეტესობას არ შეუძლია სიცრუის ამოცნობა. მართალია, სხვადასხვა ასაკის რესპონდენტებს სხვადასხვა მაჩვენებელი ჰქონდათ, თუმცა საერთო სურათზე ამას დიდი გავლენა არ მოუხდენია.

როგორც აღმოჩნდა, კვლევის პერიოდში მონაწილეებისთვის ავთენტურობაზე მნიშვნელოვანი შინაარსი აღმოჩნდა. ახალგაზრდებს არ გამოუხატავთ ინიციატივა, გადაემოწმებინათ ინფორმაციის მართებულობა, ან მასზე მიმაგრებული ფოტოს რეალური წარმომავლობა. მეტიც, დაწყებითი კლასის ბავშვები საერთოდ ვერ ხვდებოდნენ, რატომ უნდა შეეტანათ ეჭვი მასალაში.

როგორც Wall Street Journal წერს, პრობლემის გადაჭრის ერთ-ერთი გზა განათლების დონის ამაღლებაა. მათი აზრით, ახალგაზრდებს უნდა ასწავლონ ინფორმაციის წყაროს გადამოწმება, კრიტიკული აზროვნება და კითხვების დასმა.

Facebook და Google დეზინფორმაციის გავრცელების წინააღმდეგ სერიოზულ კამპანიაში არიან ჩართულები. ეს უკანასკნელი ყველა იმ წყაროს, რომელიც ყალბ სიახლეებს ათავსებს, სხვა ღონისძიებებთან ერთად, Google adSense-ს უბლოკავს.