ოკუპირებულ ცხინვალში აცხადებენ, რომ ახალგორში კორონავირუსი კიდევ ორ ადამიანს — 6 წლის ბავშვს და მის დედას გამოუვლინდათ. დღეს, 6 მაისს ცხინვალში COVID-19-ის პირველი შემთხვევა დაადასტურეს. ინფიცირებულია 14 წლის ბიჭი, რომელიც ერთ-ერთ სამხედრო სასწავლებელში ირიცხება და რეგიონში რუსეთიდან 30 აპრილს ჩავიდა.

"დედა და შვილი ვლადიკავკაზში სხვა დაავადებებზე მკურნალობდნენ. სამკურნალო დაწესებულებაში მათ კორონავირუსზე ტესტი ჩაუტარეს და გამოწერეს. სამხრეთ ოსეთში 5 მაისს დაბრუნდნენ და არავითარი კლინიკური სიმპტომი არ ჰქონდათ", — ამბობს დე ფაქტო ხელისუფლების წარმომადგენელი, ანა გაგლოევა.

მისივე თქმით, ინფიცირებულების ჯანმრთელობის მდგომარეობა დამაკმაყოფილებელია.

კორონავირუსის რამდენიმე შემთხვევაზე საუბრობენ ოკუპირებულ აფხაზეთშიც. ჯანდაცვის მინისტრის, ეკატერინე ტიკარაძის განცხადებით, ოკუპირებულ ტერიტორიაზე მცხოვრები ინფიცირებული ადამიანების რიცხვი ქვეყნის საერთო სტატისტიკაში იმიტომ არაა ასახული, რომ სანდო ინფორმაცია არ აქვთ.

მისი თქმით, ოკუპირებულ ტერიტორიებზე ინფიცირებულთა რიცხვი შეიძლება გაცილებით დიდი იყოს, ვიდრე დასახელებულია.