აშშ-ს სახელმწიფო მდივნის, მაიკ პომპეოს თქმით, არსებობს "მნიშვნელოვანი მტკიცებულებები" იმისა, რომ ვირუსი უჰანის, ჩინეთის ლაბორატორიაში შეიქმნა. ამის შესახებ პომპეომ ABC-სთან ინტერვიუში განაცხადა. მან არ დააკონკრეტა, თუ რა მტკიცებულებას გულისხმობდა.

"არსებობს მნიშვნელოვანი მტკიცებულება იმისა, თუ საიდან დაიწყო ეს ვირუსი. ჩვენ ეს თავიდანვე ვთქვით, რომ არსებობდა ვირუსი უჰანიდან, ჩინეთიდან. მათ აქვთ მსოფლიოს ინფიცირების ისტორია და აქვთ არასტანდარტული ლაბორატორიები. ეს არ არის პირველი შემთხვევა, როცა ჩინური ლაბორატორიების გამო ვირუსი მსოფლიოში გავრცელდა", — განაცხადა პომპეომ.

ჟურნალისტმა ინტერვიუსას დააზუსტა, რომ განსხვავებული პოზიციაა წარმოდგენილი აშშ-ის დაზვერვის ანგარიშში. პომპეომ ამაზე განაცხადა, რომ ნახა მათი დოკუმენტი და "არავითარი მიზეზი არ აქვს იფიქროს, რომ ცდებიან". ჟურნალისტის მხრიდან კიდევ ერთი დამაზუსტებელი კითხვის დასმის მცდელობისას სახელმწიფო მდივანმა განმარტა:

"ეს ყველაფერი კონტექსტში უნდა ჩასვათ. ჩინეთის კომუნისტურ პარტიას შანსი ჰქონდა, ყველა ეს უბედურება თავიდან აეცილებინა. აი რა მივიღეთ დღეს — მე და თქვან ამ თემაზე ვსაუბრობთ, ჩვენ ვერ ვხვდებით ერთმანეთს პირისპირ. ეს უდიდესი კრიზისია, რაც მოგვიტანა ავტორიტარული რეჟიმის ქმედებამ. ეს რომ ამერიკაში ყოფილიყო, მეცნიერები ამას გარეთ გამოტანდნენ, იქნებოდა იდეების გაცვლა და სწრაფი იდენტიფიცირება. სანაცვლოდ, ჩინეთმა დამალა. [...] ვფიქრობ, მთელი მსოფლიო ერთიანია იმ აზრის ირგვლივ, რომ ჩინეთიდან მოდის ეს ვირუსი".

სახელმწიფო მდივანმა, ასევე, განაცხადა, რომ ჯერ კიდევ უცნობია, ვირუსი შემთხვევით გავრცელდა ლაბორატორიიდან თუ განზრახ. მისი თქმით, ჩინეთში უამრავი ლაბორატორიაა, პანდემია ჯერ კიდევ მიმდინარეა და კომუნისტური პარტია დასავლეთიდან ჩასულ მეცნიერებს ლაბორატორიებში შესვლას უზღუდავს.

პრეზიდენტმა დონალდ ტრამპმა პირველ მაისს განაცხადა, რომ ნანახი აქვს "მტკიცებულება", რომლითაც Covid-19 ჩინეთში, უხანის ვირუსოლოგიის ლაბორატორიაში შექმნის ფაქტი დასტურდება.

ამასთან, აშშ-ს დაზვერვის სამსახური აცხადებს, რომ ვირუსი ადამიანის მიერ შექმნილი ან გენეტიკურად მოდიფიცირებული არაა. როგორც მათ განცხადებაშია აღნიშნული, ისინი მეცნიერთა უმრავლესობას ეთანხმებიან, რომ ვირუსი ბუნებრივ პირობებში შეიქმნა და შემდეგ ადამიანს გადაეცა.

ინფორმაცია იმაზე, რომ ვირუსი უხანის ლაბორატორიაში შეიქმნა აქამდე რუსულ პროპაგანდისტულ წყაროებზე ვრცელდებოდა.