დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ინფექციური საავადმყოფოს სამედიცინო დირექტორმა, მარინა ეზუგბაიამ 25 აპრილს აგრესიულ ტესტირებასთან დაკავშირებით საკუთარი კომენტარი განმარტა. მისი თქმით, სურვილი იყო, რომ ქვეყანას განმეორებით ბევრი აგრესიული ტესტირება არ დასჭირდეს, რადგან ეს ნიშნავს, რომ დაავადების გავრცელება ზომიერი იქნება.

"ეს იყო ჩემი სურვილი, რატომ იგებს ადამიანების ნაწილი, ჯგუფი, ამას როგორც ფაქტს, არ ვიცი, მაგრამ მე გამოვხატე სურვილი, ქვეყანას თუ არ დასჭირდება განმეორებით და ხშირად აგრესიული ტესტირება, ეს იმას ნიშნავს, რომ ჩვენთან დაავადების გავრცელება იქნება ისევ ზომიერი და კონტროლირებადი. მე განმარტება გავაკეთე ამ მოცემულობასთან მიმართებით. ვინ როგორ გაიგო, არ ვიცი, მაგრამ განვმარტავ", — თქვა მარინა ეზუგბაიამ.

ჟურნალისტებთან საუბრისას მარინა ეზუგბაიამ აღნიშნა, რომ 25 აპრილს მიზნობრივ ჯგუფებში ჩატარებული აგრესიული ტესტირების შემდეგ მხოლოდ 25 დადასტურებული შემთხვევა, ნიშნავს, რომ ქვეყანა ამ ეტაპზე გამარჯვებულია.

25 აპრილს ინფექციური საავადმყოფოს სამედიცინო დირექტორმა, მარინა ეზუგბაიამ განაცხადა, რომ ბოლო 24 საათში ქვეყანაში 25 ახალი შემთხვევა ფართო მასშტაბით აგრესიული კვლევის შედეგია. მისი თქმით, იმედოვნებენ, რომ მომავალ დღეებში აგრესიული კვლევის გარეშე ასეთი მაჩვენებლები აღარ იქნება.

ეზუგბაიას განცხადებას, საზოგადოების, ექიმების ნაწილისა და პოლიტიკოსების კრიტიკა მოყვა. მათი განცხადებით, ამან მასობრივი ტესტირების აუცილებლობა წარმოაჩინა. თუმცა, პაატა იმნაძე აცხადებს, რომ ტესტირების საკითხს ამ თემაზე მომუშავე ჯგუფი გადაწყვეტს.

ბოლო მონაცემებით, საქართველოში კორონავირუსის 496 დადასტურებული შემთხვევაა, ინფიცირებულებს შორის გამოჯანმრთელებულია 149 და გარდაცვლილია 6 პირი. კარანტინის რეჟიმში 4 833 პირი რჩება, სტაციონარში მეთვალყურეობის ქვეშ კი 571 ადამიანია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: