დავით უსუფაშვილმა პარლამენტის თავჯდომარის რანგში მედიასთან ბოლო შეხვედრა გამართა და განაცხადა, რომ ისურვებდა, რომ რუსთავი 2 თავის დანიშნულებას დაუბრუნდეს და ისევ ტელევიზია გახდეს:

"მე ვისურვებდი, რომ რუსთავი 2 დაუბრუნდეს თავის დანიშნულებას და გახდეს ისევ ტელევიზია და მაშინ იქნება მნიშვნელოვანი და სერიოზული როლის შემსრულებელი ქვეყნის ცხოვრებაში. სხვა შემთხვევაში, ამ არჩევანით, რომ ვარ პოლიტიკური მოთამაშე, მაგრამ ამასობაში თან ვმაუწყებლობ ჩემივე ოთახიდან ამ უბედურებებს და გართულებებს ბოლო არ ექნება".

მან ასევე განმარტა, რომ რუსთავი 2-ში უმაღლესი კლასის პროფესიონალები მუშაობენ:

"ამ ტელევიზიის ჟურნალისტური კორპუსი და ყველა ის ადამიანი, ვინც მის ეთერში გაშვებას უზრუნველყოფს, ჩემი აზრით, არიან უმაღლესი კლასის პროფესიონალები და ბაზარზე ყველას ვუსურვებ, რომ პროფესიონალიზმის, ოპერატიულობის თვალსაზრისით, არ ვიცი კიდევ, ყველა ტელევიზიას ჰგონია, რომ არქივი აქვს, მაგრამ რატომღაც, რუსთავი 2 ახერხებს 5 წუთში ამოაძროს ის საჭირო საკითხები, სხვა ტელევიზიებს შეიძლება 2 დღე დასჭირდეთ. ბოდიშს ვუხდი ყველას".