ამერიკელი სენატორი რესპუბლიკური პარტიიდან ლინდსი გრეჰემი აცხადებს, რომ აუცილებელია სენატმა განიხილოს გამოძიების საკითხი თემაზე, იყო თუ არა რუსეთის პრეზიდენტი ვლადიმერ პუტინი ამერიკის საპრეზიდენტო არჩევნებში ჩარეული. მისი თქმით, ეჭვები მას შემდეგ გაძლიერდა, რაც ტრამპმა სურვილი გამოთქვა გააუმჯობესოს ურთიერთობა რუსეთთან. ინფორმაციას ჰაფინგტონპოსტი ავრცელებს.

"თუ დადასტურდება, რომ რუსეთის მთავრობა აკონტროლებს მის საზღვარგარეთ ქვეყნებს არარეგალური ორგანიზაციების დახმარებით, რომლებიც ჩვენს არჩევნებში ჩაერივნენ, ისინი უნდა დაისაჯონ. პუტინი უნდა დაისაჯოს" - თქვა გრეჰემმა.

ეროვნული სადაზვერვო დეპარტამენტის ინფორმაციით, ზაფხულში დემოკრატების პარტიის საიტებზე და იმეილებზე კიბერ-შეტევა რუსეთიდან განხორციელდა, რაც პუტინმა უარყო. აღნიშნულმა არალეგალურმა ქმედებამ დემოკრატიული პარტიის წინასაარჩევნო კამპანია დააზარალა.

ამასთან დაკავშირებით მესამე საპრეზიდენტო დებატებზე ჰილარი კლინტონმაც ისაუბრა და დონალდ ტრამპს "პუტინის სათამაშო" უწოდა.

ასევე რესპუბლიკელმა ჯონ მაკკეინმა დღეს განაცხადა, რომ მიუღებელია ტრამპის მიერ რუსეთთან ურთიერთობის დალაგების მცდელობა:

მისი განცხადებით, მოსკოვთან ურთიერთობის განახლება ამერიკას სირიელი ხალხის მასობრივ მკვლელობაში თანამონაწილეს გახდის, რომელსაც ვლადიმერ პუტინი და სირიის პრეზიდენტი ბაშარ ასადი ახორციელებენ.