გარემოს დაცვის კომიტეტის თავმჯდომარე, ნინო წილოსანი ამბობს, რომ იმ ადამიანებს, ვინც ამტკიცებს, რომ ახალი ტყის კოდექსი საპატრიარქოსთვის ტყის მასივის გადაცემას ითვალისწინებს, ის წაკითხულიც არ აქვთ.

მისივე თქმით, კომიტეტი კანონპროექტის დღეს აღარ განიხილავს და პარლამენტის ჩვეულ რეჟიმში მუშაობის დაწყებამდე გადაიდება.

"ახალი კოდექსი ავალდებულებს ყველას: მუნიციპალიტეტებს, სააგენტოებს, ეკლესიასა თუ სხვა ნებისმიერი სუბიექტს, რომელიც ფართობს უკვე ფლობს, რომ დააკმაყოფილოს ახალი კოდექსით გათვალისწინებული ობიექტური კრიტერიუმები, რომელთა შემუშავებაში ჩართული იყო: არასამთავრობო ორგანიზაციები, უცხოელი პარტნიორები, სატყეო სექტორის, გარემოს დაცვისა და ბიომრავალფეროვნების სპეციალისტები. ყველა სხვა ინტერპრეტაცია არის უპასუხისმგებლობა ან მიზანმიმართული დეზინფორმაცია", — განაცხადა წილოსანმა.

ტოლერანტობის და მრავალფეროვნების ინსტიტუტი (TDI) აცხადებდა, რომ საგანგებო მდგომარეობის დროს პარლამენტი საპატრიარქოსთვის ტყეების საკუთრებით გადაცემას განიხილავდა.

TDI-ში ამბობენ, რომ საპატრიარქო ერთადერთი ინსტიტუციაა, რომელიც საგანგებო მდგომარეობის შეზღუდვებს არ ემორჩილება და ამ დროს ხელისუფლება მათთან მოლაპარაკებებს მართავს.