პარტია ახალი საქართველოს ლიდერის, გიორგი ვაშაძის თქმით, გიორგი გახარიამ პილატესავით ხელები დაიბანა და პასუხისმგებლობა ხალხს დააკისრა. მისი თქმით, პრემიერ-მინისტრი სიგნალებით და მინიშნებებით არ უნდა მოქმედებდეს. ამ თემაზე მან TV პირველის ეთერში ისაუბრა.

"სახელმწიფო გვაქვს თუ ბოსტანი, რისთვისაა საგანგებო რეჟიმი გამოცხადებული, რისთვის გვაქვს კონსტიტუცია და კანონი, რისთვის ვკეტავთ ქალაქებს. გახარია არის პირველი პირი ვინც უნდა მიიღოს გადაწყვეტილება ყველაფერზე და პილატესავით ხელები დაუბანია და პასუხისმგბელობას ხალხს აკისრებს. სხვებს მოუწოდებს ვაჟკაცობისკენ, ეს არის უსინდისობა და ადამიანების გაწირვა", — თქვა გიორგი ვაშაძემ.

ვაშაძის თქმით, ხელისფულება პასუხისმგებლობას ვერ იღებს საკუთარ თავზე და სურს, რომ ხელი ეკლესიისკენ გაიშვიროს. მან თქვა, რომ ღმერთი არ უნდა გამოვცადოთ.

დღეს, 14 აპრილს მთავრობის ბრიფინგზე გიორგი გახარიამ თქვა, რომ ეკლესიები არ დაიხურება, მათ შორის არც აღდგომის ღამეს. ამას გარდა, ცნობილი გახდა, რომ საქართველოში საგანგებო მდგომარეობა 10 მაისამდე გახანგრძლივდა. ასევე, 15 აპრილის 21 საათიდან თბილისში, რუსთავში, ბათუმსა და ქუთაისში შესვლა და გამოსვლა 10 დღით აიკრძალება.

ბოლო მონაცემებით, საქართველოში კორონავირუსი 296 ადამიანს დაუდასტურდა. მათგან გამოჯანმრთელებულია 69, ხოლო გარდაცვლილია 3 ადამიანი. კარანტინის რეჟიმში 4 856 ადამიანი იმყოფება, სტაციონარში მეთვალყურეობის ქვეშ კი 458.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: