ენმ-ს წევრის, ზურაბ ჭიაბერაშვილის განმარტებით, მთავრობის მიერ დღეს გაკეთებული განცხადება, რომელიც ლარის გაუფასურების მიზეზებსა და ამ სიტუაციიდან გამოსავლის პოვნას ეხება, ბუნდოვანია. ის განმარტავს, რომ პარტია მთავრობას უკვე რამდენიმე წელია აფრთხილებს, რომ შიდა ვალების აღება და ბიუროკრატიული ხარჯების გაზრდა ასეთ შედეგებამდე მიიყვანდა ქვეყანას, თუმცა, უშედეგოდ:

"მთავრობის განცხადება გაჯერებულია ტყუილებით და არაკომპეტენტური მოსაზრებებით. მანამდეც არაერთი ტყუილი მოგვისმენია. 2015 წლის თებერვალშიც, როდესაც ლარი მკვეთრად დაეცა, კვირიკაშვილმა და ხადურმა ქამრების შემოჭერის პროგრამა გამოაცხადეს, მაგრამ არაფერი ამ მიმართულებით არ გაკეთებულა. ისინი დღეს აცხადებენ, რომ იმისთვის რომ მდგომარეობა გამოსწორდეს ეკონომიკური ზრდა მნიშვენელოვანია, მაგრამ ჩვენ ვხედავთ, რომ მას შემდეგ, რაც ივანიშვილი მთავრობაში მოვიდა, ეკონომიკური ზრდა განულებულია".

ჭიაბერაშვილმა ასევე განმარტა, რომ მთავრობის განცხადება, თითქოს მეზობელ ქვეყნებშიც ვალუტის დევალვაციის პროცესი მიმდინარეობდეს, ტყუილია და ის ამას ვერ დაასაბუთებს. ამასთან ის ამბობს, რომ ექსპორტი შემცირებულია და იმპორტიც მცირდება:

"საქსტატიც ამბობს, რომ თუ გამოვაკლებთ ც ჰეპატიტს სამკურნალოდ ნაჩუქებ მედიკამენტებს, იმპორტი შემცირებულია 2 პროცენტით. ანუ ის რომ თითქოს იმპორტი გაიზარდა და ამის გამო მეტი ვალუტა გადის, ტყუილია.

საუბრობენ, რომ მომავალი წლის ბიუჯეტში ძირითადი აქცენტი გადატანილი იქნება ეკონომიკური ზრდის დაჩქარებაზე - გაიზრდება ინფრასტრუქტურული პროექტების პორტფელი. ამასთან, მოხდება ადმინისტრაციული ხარჯების მნიშვნელოვანი შემცირება. რა განცხადება გააკეთა 2015 წელს პარლამენტში კვირიკაშვილმა, როცა 4 პუნქტიანი გეგმა წარმოადგინა? ახსენეს ქამრების შემოჭერა?! ადმინისტრაციული ხარჯების შემცირება?! ფუფუნების საკნებზე უარის თქმა?! და რა გააკეთეს?! შედეგი ნულია".

საქართველოს მთავრობამ ლარის კურსის მკვეთრ გაუფასურებასთან დაკავშირებით დღეს სპეციალური განცხადება გააკეთა და აღნიშნულის გამომწვევ მიზეზებზე ისაუბრა. მან ასევე ის ღონისძიებები დაასახელა, რომლებმაც ქვეყანა ამ სიტუაციიდან უნდა გამოიყვანოს.