1970-ანი წლების ერთ-ერთი ყველაზე ცნობილი მუსიკოსი, სოულის ჟანრის გამორჩეული შემსრულებელი, ბილ უიზერსი ლოს-ანჯელესში გასულ ორშაბათს გარდაიცვალა.

მისი ოჯახის მიერ გავრცელებულ განცხადებაში ვკითხულობთ:

"განადგურებულები ვართ ჩვენი საყვარელი ოჯახის წევრის, ერთგული ქმრისა და მამის დაკარგვის გამო. ეს მარტოსული კაცი, რომელსაც გულით სურდა მთელი მსოფლიო თავისი პოეზიითა და მუსიკით გაეერთიანებინა, ადამიანებთან მუდამ გულწრფელი იყო და ამ გზითვე სურდა სხვების ერთიანობაც".

ბილ უიზერსმა მოღვაწეობა 1970 წელს დაიწყო და თავისი ისეთი ცნობილი ჰიტებით, როგორებიცაა Ain't No Sunshine და Lean On Me, ამ პერიოდის ერთ-ერთ ყველაზე გავლენიან მუსიკოსად ითვლება.

მიუხედავად იმისა, რომ მუსიკალური კარიერა 1985 წელს დაასრულა, მისმა შემოქმედებამ შემდგომში R&B-სა და ჰიპ-ჰოპის ჟანრის განვითარებაზე დიდი გავლენა იქონია.