რუსეთის მართლმადიდებელი ეკლესიის მრევლი მზად უნდა იყოს, რომ მათგან დიდ ნაწილს პატრიარქის სააღდგომო ლიტურგიის ნახვა ტელევიზორით მოუწევს. ამის შესახებ რუსეთის მართლმადიდებელი ეკლესიის საზოგადოებასთან ურთიერთობის დეპარტამენტის ხელმძღვანელმა, მიტროპოლიტმა ილარიონმა ისაუბრა.

"ვფიქრობ, სპეციალურად მოვისაზრებთ ამ სიტუაციაში როგორ აღვნიშნოთ ვნების კვირა და აღდგომა. თუმცა მზად უნდა ვიყოთ იმისთვის, რომ შესაძლოა, ბევრს პატრიარქის სააღდგომო ლიტურგიის ნახვა ცენტრალური არხების ტრანსლაციით მოგვიწევს და ტაძარში ვერ შევალთ", — განაცხადა ილარიონმა.

ამასთან, მიტროპოლიტმა დაამატა, რომ ეპიდემიის საშიშროების გამო ეკლესიებში ზიარება უახლოეს პერიოდში აღარ მოხდება. ხოლო იზოლაციის პერიოდში მღვდელთან შეთანხმებით აღსარების ჩაბარება ტელეფონით ან სკაიპით იქნება შესაძლებელი.

კორონავირუსის გამო სპეციალური ზომები უკვე მიიღეს სხვა მართლმადიდებელმა ეკლესიებმა. საბერძნეთის ეკლესია 19 აპრილს, აღდგომას ღვთისმსახურება ჩაატარებს, თუმცა მრევლი დაშვებული არ იქნება. საზეიმო აღნიშვნა კი საბერძნეთის ეკლესიამ ერთი თვი გადაწია.

რა ზომებს მიიღეს საქართველოს მართლმადიდებელი ეკლესია ჯერ უცნობია. თუმცაღა საგანგებო მდგომარეობისა და შეზღუდვების მიუხედვად მრევლი ტაძრებში ღვთისმსახურება ისევ ესწრება. დეკანოზმა შალვა კეკელიამ განაცხადა, რომ სააღდგომოდ ადამიანები ტაძარში საღამოს 9 საათამდე მივლენ, გადანაწილდებიან ტაძარში და დილის 6 საათის შემდეგ სახლებში წავლენ.