დაავადებათა კონტროლის ცენტრი არ ავრცელებს ზუსტ ინფორმაციას, უარი თქვეს თუ არა ცენტრის დირექტორმა და მისმა მოადგილემ მედიასთან ურთიერთობაზე.

On.ge უწყებას მას შემდეგ დაუკავშირდა, რაც ნეტგაზეთმა დაწერა, რომ ამირან გამყრელიძე და პაატა იმნაძე ამიერიდან მედიასთან კომენტარს არ გააკეთებენ.

პრესსამსახურში ამბობენ, რომ NCDC ინფორმაციას დღეში ერთხელ გაავრცელებს, თუმცა რა ფორმით, არ იციან. ამასთან, არ აზუსტებენ არც იმას, ვინ იქნება სპიკერი ან ინფორმაციის გამავრცელებელი.

კითხვას, გადაწყვიტეს თუ არა იმნაძემ და გამყრელიძემ მედიასთან კომუნიკაციის შეზღუდვა, პრესსამსახურში პასუხობენ, რომ მათ დღეს არ ეცალათ. On.ge-მ სცადა დაზუსტება, სხვა დროს გააკეთებენ თუ არა კომენტარს ისინი, რაზეც შემდეგი პასუხი მივიღეთ:

"რა იქნება ხვალ, ვერ გეტყვით".

ნეტგაზეთის ინფორმაციით, ამიერიდან, დაავადებათა კონტროლის ეროვნული ცენტრის წარმომადგენლები მედიასთან კომენტარს აღარ გააკეთებენ და სიახლეებს ვებ-გვერდზე გამოაქვეყნებენ. გამოცემა წერს, რომ მათ ამის შესახებ უწყების პრესსამსახურში უთხრეს.

მას შემდეგ, რაც საქართველოში კორონავირუსის შემთხვევები დადასტურდა, ამირან გამყრელიძე და პაატა იმნაძე მედიასთან აქტიურად კონტაქტობენ. ისინი ხშირად არიან სატელევიზიო გადაცემების სტუმრებიც. ბოლო რამდენიმე ინტერვიუს დროს საზოგადოების ნაწილმა ჟურნალისტები გაკრიტიკა იმის გამო, რომ მათ არასასიამოვნო კითხვები დაუსვეს. ამასთან დაკავშირებით განცხადება გაავრცელა ჟურნალისტური ეთიკის ქარტიამაც და აღნიშნა, რომ ჟურნალისტების დანიშნულება სწორედ მწვავე და კრიტიკული კითხვების დასმაა.

ბოლო მონაცემებით, საქართველოში კორონავირუსით ინფიცირება დაუდასტურდა 100 ადამიანს, მათგან 18 გამოჯანმრთელებულია. კარანტინის რეჟიმშია 4 978 ადამიანი, ხოლო სტაციონარში მეთვალყურეობის ქვეშ — 266.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: