პენიტენციური სამსახური სახელმწიფო ინსპექტორის გადაწყვეტილებას ისე გამოეხმაურა, რომ განცხადებაში იუსტიციის სამინისტროს დაჯარიმების ფაქტი არ ახსენა. პარლამენტში, თეა წულუკიანის მიერ ციხის ვიდეოში ომბუდსმენის თანამშრომლის სახის ჩვენება ინსპექტორმა უკანონოდ მიიჩნია. პენიტენციურმა კი მხოლოდ ის ნაწილები ჩამოთვალა, სადაც ინსპექტორმა უწყება გაამართლა.

ამასთან, განცხადებას თან დაურთეს ინსპექტორის გადაწყვეტილების სრული ვერსია, სადაც მკაფიოდ წერია, რომ იუსტიციის სამინისტრო და პენიტენციური სამსახური სამართალდარღვევად ცნეს. კერძოდ, პერსონალურ მონაცემთა დაცვის შესახებ კანონის 43-ე მუხლის პირველი ნაწილით. ორივე უწყებას ადმინისტრაციული სახდელის სახით 500-500 ლარი დააკისრეს. გარდა ამისა, სახელმწიფო ინსპექტორმა სპეციალურ პენიტენციურ სამსახურსა და სამინისტროს ვიდეოჩანაწერების წაშლა ან პერსონალური ინფორმაციის დაფარვა დაავალა.

პენიტენციური სამსახურის 27 მარტის განცხადებაში წერია ის, რომ ინსპექტორის გადაწყვეტილებით, სამინისტროს უფლება ჰქონდა ბრალდებულს/მსჯავრდებულს დაკვირვებოდა ვიზუალურად, მოსმენის გარეშე; ჰქონდა მასალის დაარქივების/შენახვის უფლება; ასევე, სამინისტროს შეეძლო, ვიდეო გამოეყენებინა მტკიცებულებად, საპასუხო არგუმენტებისთვის.

"პენიტენციურ სამსახურში და პენიტენციურ დაწესებულებებში მომუშავე პირების კანონიერი ინტერესების, სამსახურის რეპუტაციის დაცვისა და რეალური სურათის ჩვენებით მაღალი საზოგადოებრივი ინტერესის დაკმაყოფილების მიზნით გასაჯარობდა ჩანაწერები. [...] არასამთავრობო ორგანიზაციის არგუმენტი იმასთან დაკავშირებით, რომ სპეციალური პენიტენციური სამსახურის მიერ ჩანაწერების ჩაწერა/დაარქივებასთან არსებობდა კითხვის ნიშნები, სახელმწიფო ინსპექტორის მოცემული გადაწყვეტილებით არ იქნა გაზიარებული და ჩანაწერების როგორც შექმნა, ისე მათი შენახვა და დაარქივება კანონიერად იქნა მიჩნეული", — წერია განცხადებაში.

ომბუდსმენის თანამშრომლის პერსონალური მონაცემები პენიტენციური სამსახურის ოფიციალურ ვებ-გვერდსა და სოციალური ქსელის გვერდზე გავრცელდა. გარდა ამისა, კადრები გააშუქეს ტელევიზიებმა და საინფორმაციო სააგენტოებმა.

შესაბამისი რეაგირების მოთხოვნით სახელმწიფო ინსპექტორის სამსახურს ახალგაზრდა იურისტთა ასოციაციამ მიმართა. საია-ს განცხადებაში ვკითხულობთ, რომ ვიდეო 2019 წლის 19 აპრილს ჩაიწერეს და 2020 წლის 21 იანვარს გავრცელდა.

თეა წულუკიანმა ციხის მონიტორინგის კადრები პარლამენტში მოსმენის დროს გაასაჯაროვა. არასამთავრობო ორგანიზაციებმა ეს ფაქტი კანონისა და საერთაშორისო ვალდებულებების დარღვევად შეაფასეს. მათი განცხადებით, იუსტიციის მინისტრის ეს ქმედება მისი პოლიტიკური პასუხისმგებლობის დაყენების საფუძველი უნდა გახდეს.

სახალხო დამცველმა ნინო ლომჯარიამ კი განაცხადა, რომ კადრების რამდენიმე თვით დაარქივებისა და გასაჯაროების გამო, წულუკიანს სახელმწიფო ინსპექტორის აპარატში უჩივლებდა.