დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ეროვნული ცენტრის სამეცნიერო ხელმძღვანელის, პაატა იმნაძის თქმით, ბავშვები კორონავირუსის გავრცელების დაბალი რისკ ჯგუფში რჩებიან, თუმცა ისინი დაავადების გავრცელების რისკს წარმოადგენენ. ამის შესახებ პაატა იმნაძემ მთავრობის ადმინისტრაციაში ისაუბრა.

"ჯერჯერობით, საბედნიეროდ ბავშვები ისევ რჩებიან დაბალი რისკის მქონე, როგორც დაავადების მიმღებლობასთან დაკავშირებით, ასევე დაავადების სიმძიმესთან მიმართებაში. თუმცა ბავშვები რისკს წარმოადგენენ დაავადების გავრცელებასთან დაკავშირებით. მათ მსუბუქად გადააქვთ, მაგრამ შეიძლება იყვნენ გავრცელების წყარო იგივე ბაბუებისთვის და ბებიებისთვის", — თქვა პაატა იმნაძემ.

დღეს, 18 მარტს ინფექციური საავადმყოფოს დირექტორმა, მარინა ეზუგბაიამ თქვა, რომ საქართველოში ინფიცირებული 38 პაციენტიდან 4 ბავშვია და მათი მდგომარეობა დამაკმაყოფილებელია.

პანდემია და რეკომენდაციები

18 მარტის მონაცემებით, საქართველოში კორონავირუსით ინფიცირების 38 შემთხვევაა დაფიქსირებული. ერთ ახალ შემთხვევაზე დღეს ინფექციური საავადმყოფოს დირექტორმა, მარინა ეზუგბაიამ განაცხადა.

38-დან ერთი, პირველი პაციენტი, რომელიც ირანიდან შემოვიდა გამოჯანმრთელდა და გუშინ საავადმყოფოდან გაწერეს. კარანტინში რჩება 1130 ადამიანი, სტაციონარში — 81.

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა და უწყებათაშორისი საკოორდინაციო საბჭო მუშაობის საგანგებო რეჟიმზე გადავიდა და შეზღუდვები და რეკომენდაციები გაავრცელა. ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული ისევე, როგორც კაფე-ბარებსა და რესტორნებს. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაყავს. ასევე, შეიქმნება სპეციალური მექანიზმი, რომელიც საკოორდინაციო საბჭოს გადაწყვეტილებების აღსრულებას შეამოწმებს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: