თურქეთის პრეზიდენტმა, რეჯეპ ტაიპ ერდოღანმა სტამბულში გამართულ ფინანსურ კონგრესზე განაცხადა, რომ ბაქო-თბილისი-ყარსის რკინიგზა 2017 წლის ბოლოსთვის ექსპლუატაციაში უნდა შევიდეს. ინფორმაციას Ekhokavkaza ავრცელებს.

ერდოღანის თქმით, ამ და სხვა მნიშვნელოვანი პროექტების განხორციელება, ქვეყანაში მომხდარი სახელმწიფო გადატრიალების მცდელობისა და ეკონომიკური გამოწვევების მიუხედავად, მაინც გაგრძელდა.

ბაქო-თბილისი-ყარსის რკინიგზა აზერბაიჯანის, საქართველოსა და თურქეთის შეთანხმების საფუძველზე შენდება. აღნიშნული კორიდორის გამტარიანობა 17 მილიონი ტონა ტვირთია წელიწადში.

თავდაპირველად ეს მაჩვენებელი ერთი მილიონი მგზავრი და 6,5 მილიონი ტონა ტვირთი იქნება. მგზავრთა გადაყვანა ბაქო-თბილისი-ყარსი-სტამბულის გზით განხორციელდება. რაც შეეხება ვაგონებს, იქნება 4 კატეგორია: სტანდარტული, კომფორტული, ბიზნესი და რესტორანი. კატეგორიიდან გამომდინარე, ისინი იქნება 10, 20 და 32 ადგილიანი.