პარლამენტის პირველი ვიცე-სპიკერი, გია ვოლსკი, ევროპული საქართველოს ერთ-ერთ ლიდერს, გიგა ბოკერიას იწვევს, რომ რომელიმე მაჟორიტარულ ოლქში თავისი კანდიდატურა დააყენოს. ვოლსკის თქმით, წინააღმდეგ შემთხვევაში, თუ ბოკერია ამაზე უარს იტყვის, გაამყარებს ეჭვს, რომ მათ მოლაპარაკების ნაცვლად, დესტაბილიზაცია სურთ.

"ლოგიკასაც რომ დავაკვირდეთ, პროცესი როგორ ვითარდება, ვამბობთ, რომ 40%-ზე ნაკლები არ უნდა იყოს მმართველი გუნდის რესურსი. პრინციპულად შევთანხმდით და არ გვგონია, რომ მისი დარღვევის სხვა ლოგიკური ახსნა არსებობდეს, თუ არა ის, რომ მათთვის დესტაბილიზაციაა ერთადერთი გზა", — განაცხადა ვოლსკიმ.

მას შემდეგ, რაც საარჩევნო სისტემაზე საუბარი განახლდა, ოპოზიციამ მოითხოვა, რომ უმრავლესობის ჩამოყალიბება ვერ შეძლოს ვერცერთმა პარტიამ, რომელიც ხმების 40%-ზე ნაკლებს აიღებს. ოპოზიციის განცხადებით, ერთადერთი თანაფარდობა, რომელიც უზრუნველყოს წარმომადგენლობის პროპორციულობას არის 130/20-ზე. მათი მთავარი მოთხოვნა იყო დაკავებული ოპოზიციონერების გათავისუფლებაც.

ქართულ ოცნებაში განაცხადეს, რომ 40%-იან ბარიერზე თანახმა არიან, რადგან 50%-ზე ნაკლების აღებას არ აპირებენ. საპასუხოდ მათ ოპოზიციას 110/40-ზე ფორმატი შესთავაზეს, თუმცა დაკავებულ ოპოზოციონერებს ისინი პოლიტპატიმრებად არ მიიჩნევენ. ამიტომ ოპოზიციამ მოლაპარაკებების მეხუთე რაუნდზე უარი განაცხადა.