ჯანდაცვის ყოფილი მინისტრი, დავით სერგეენკო ამბობს, რომ მძიმე ტვირთად აწევს ის ფაქტი, რომ ინფექციურ საავადმყოფოში არსებული ინფრასტრუქტურის პრობლემები ვერ მოაგვარა. მისი თქმით, შეიძლება მინისტრობის პერიოდის ყველაზე დიდი ტვირთი სწორედ ეს იყოს.

"მე, მართლაც, ადამიანურად ძალიან ვწუხვარ და ეს ჩემი ბრალიცაა დიდწილად, რომ ამ წლების განმავლობაში, სანამ მინისტრად ვმსახურობდი, ვერ მოვახერხე ამ პრობლემის მოგვარება და მართლაც მძიმე ტვირთად მაწევს. შეიძლება ყველაზე დიდი ტვირთი ჩემი ამ განვლილი მინისტრობიდან სწორედ ეს იყოს. ჩვენ ინფრასტრუქტურის პრობლემების მოსაგვარებლად სხვადასხვა გზები გვქონდა, მაგრამ სამწუხაროდ ვერ მოვახერხე ამის გაკეთება", — თქვა დავით სერგეენკომ.

ყოფილმა მინისტრმა ჟურნალისტებთან საუბრისას აღნიშნა, რომ მისი ინფორმაციით, მომავალში ინფექციური საავადმყოფოს გადატანა დიღმის კლასტერში იგეგმება. დავით სერგეენკომ თქვა, რომ იქ ახალაშენებული კლინიკა გადაკეთებას საჭიროებს, რის შემდეგაც ექიმებსა და პაციენტებს შესაბამისი პირობები ექნებათ.