პრემიერ-მინისტრ გიორგი გახარიას თქმით, საარჩევნო სისტემასთან დაკავშირებით სტრატეგიული პარტნიორები "იდეალურად ხედავენ" ვინ არის მოტივირებული კონსენსუსის მიღწევისთვის.

"დარწმუნებული ვარ, რომ ჩვენი საერთაშორისო მეგობრები, სტრატეგიული პარტნიორები იდეალურად ხედავენ ვის რა ფუნქცია აქვს, ვინ რას აკეთებს, ვინ უფრო მოტივირებულია, მსგავსი კონსენსუსისა და შედეგის მიღწევისთვის", — აღნიშნა გახარიამ.

გახარიას განცხადებით, მთავრობას კომუნიკაციის პრობლემა არ აქვს.

"მოდით ასე მოვიქცეთ, ყველანაირი პოლიტიკური შეთანხმება შეიძლება ეყრდნობოდეს მხოლოდ და მხოლოდ კონსენსუსს. კონსენსუსი არის შედეგი ყველა მხარის მიერ პატარა-პატარა რაღაცების დათმობის. ეს პროცესია. დარწმუნებული ვარ, რომ ყველას ეყოფა პასუხისმგებლობა იმისთვის, რომ თავიანთი ვიწრო პოლიტიკური ინტერესებიდან გამომდინარე ქვეყანა არ დააყენონ რისკის ქვეშ", — აღნიშნა გახარიამ.

პარტია ახალი საქართველოს ლიდერის, გიორგი ვაშაძის თქმით, ქართულმა ოცნებამ ოპოზიციას მანდატების ახალი გადანაწილება შესთავაზა, რაც 110 პროპორციულ და 40 მაჟორიტარულ მანდატს გულისხმობს. ამის შესახებ ვაშაძემ, ევროკავშირის ელჩის, კარლ ჰარცელის რეზიდენციაში მიმდინარე შეხვედრიდან გამოსვლის შემდეგ განაცხადა. როგორც ვაშაძემ თქვა, ახალი შეთავაზება უმრავლესობის წევრმა, ირაკლი კობახიძემ გააჟღერა.

აღნიშნულ ინფორმაციას უარყოფს ირაკლი კობახიძე. მისი თქმით, დღევანდელი შეხვედრა მოლაპარაკების ფორმატის არ ყოფილა და შესაბამისად, არც შეთავაზებები გაჟღერებულა.

ამავე დროს, მამუკა მდინარაძე ამბობს, რომ ქართული ოცნება მზადაა, ოპოზიციასთან საარჩევნო სისტემის ისეთ მექანიზმზე შეთანხმდეს, რომელიც 40%-ზე ნაკლები მხარდაჭერის მქონე პოლიტიკურ ძალას მთავრობის დაკომპლექტების საშუალებას არ მისცემს.