პრეზიდენტის მრჩეველმა პოლიტიკურ საკითხებში ფიქრია ჩიხრაძემ TV პირველთან საუბრისას განაცხადა, რომ არჩევნების პირველი ტურის მეორე დღესვე გამოავლინეს ოცნების ლიდერებმა ის დამოკიდებულება, რაც მარგველაშვილთან მიმართებაში არსებობს:

"როდესაც გყავს საკონსტიტუციო უმრავლესობა, ჩნდება ეჭვი, რომ საკუთარ ტყავზე და გემოვნებაზე ირგებ საკონსტიტუციო ცვლილებებს. ეს ეჭვი არსებობდა ნაციონალური მოძრაობის დროსაც, როდესაც პერსონალური ინტერესებიც იყო ხოლმე გათვალისწინებული ხშირ შემთხვევებში. პრეზიდენტის მიმართ გაკეთებული განცხადებები ამ პროცესს კიდევ უფრო აზიანებს, რადგან ყველა სუბიექტური მოსაზრებებიდან გამომდინარე საუბრობდა".

ჩიხრაძე დასძენს, რომ ქართულ ოცნებას ერთპიროვნული ცვლილებების გატარება შეუძლია, თუმცა მათ "ტყავზე და გემოვნებაზე" მორგებულ და გატარებულ ცვლილებებს კონსტიტუციაში ნდობა არ ექნება, როგორც ეს ნაციონალური მოძრაობის შემთხვევაში მოხდა.